Tortë pranverore Mimoza
Përbërësit:
Baza e tortës:
- 130 gr miell
- 110 gr niseshte
- 240 gr sheqer
- 1 bustinë vanilje
- 8 vezë
- Pak kripë
- Lëkurë limoni
Sherbeti:
- 140 ml ujë
- 80 gr sheqer
Kremi i pastiçerisë:
- 170 gr sheqer
- 5 të verdha vezësh
- 500 ml qumësht
- 50 gr niseshte misri
- 1 bustinë vanilje
- 120 ml pana
Përgatitja:
Rrahim vezët për rreth 20 minuta derisa të bëhen krem, më pas shtojmë sheqerin dhe kripën dhe e rrahim derisa të rritet volumi i vezëve. Shtojmë miellin dhe niseshten e situr dhe e trazojmë lehtë me telin e kuzhinës në mënyrë që të mos ulet vëllimi. Në fund shtojmë lëkurën e grirë të nje limoni. Lyejmë një tavë me pak gjalpë, e spërkasim me pak miell dhe shtojmë masën e brumit. E vendosim të piqet në furrë në temperaturën 180 gradë Celsius për 25-30 minuta. Ndërkohë përgatisim kremin. Rrahim të verdhat e vezëve bashkë me sheqerin derisa sheqeri të tretet. Në një enë të vogël me qumësht tresim niseshten dhe vaniljen dhe e shtojmë tek vezët. Vendosim qumështin të ngrohet në zjarr të ulur dhe sapo qumështi të vaket pak shtojmë vezët dhe e trazojmë derisa kremi të lidhet. E lemë kremin të ftohet plotësisht. Rrahim panën në marengë të fortë dhe pasi kremi të jetë ftohur shtojmë gjysmën e marengës. Pandispanjën pasi të jetë pjekur e lëmë të ftohet dhe më pas e presim horizontalisht. Sherbetosim njërën pjesë, ndërsa tjetrën e presim në kubikë të vegjël ose e thërrmojmë me duar për të krijuar idenë e mimozave. Mbi bazën e padispanjës vendosim kremin e pasticerisë, e nivelojmë mirë dhe më pas vendosim pjesën e marengës. Sipër e dekorojmë me pandispanjën e thërrmuar.
Komente
