Tiranë- Gjykata e Posaçme Antikorrupsion vendosi sot konfiskimin e pjesshëm të aseteve të Armando Doçajt, i akuzuar si pjesë e organizatës së narkotrafikut të kokainës në Danimarkë dhe vendet e BE-së nga Amerika Latine, e drejtuar nga Astrit Beqiraj.
Bëhet fjalë për konfiskimin e 6 pasurive, mes të cilave 4 llogari bankare me shumën totale 4 mijë euro, një apartament dhe një njësi shërbimi.
Vendimi është marrë ditën e sotme (7 mars), pas kërkesës së SPAK. Gjyqtari Erjon Çela, pasi shqyrtoi kërkesat e palëve, vendosi që një prej këtyre pasurive të mos konfiskohej dhe bëhet fjalë për një apartament të porositur.
SPAK kishte kërkuar dhe nisur prej 28 prillit 2023 hetimin pasuror ndaj Doçajt dhe të tjerëve, me objekt: “konfiskim i pasurive të luajtshme dhe të paluajtshme”. Më herët, më 5 maj 2021, GJKKO kishte pranuar sekuestron preventive mbi 7 pasuritë e të proceduarit dhe personave të tjerë të lidhur me të, të afërmit Pjetër Doçaj, Roberta Doçaj dhe Shkëlzen Doçaj.
Më 21 shtator 2024 SPAK mbylli hetimet dhe dosja iu dërgua GJKKO-së për proces me tre akuza dhe 17 anëtarë të grupit, shumica të dënuar më parë. Dy prej tyre mbanin disa identitete. Fitimet silleshin me mjete transporti në Shqipëri dhe konvertoheshin ne prona e biznese nga Jetmir Kastrati dhe kunati i tij, Astrit Beqiraj.
Bëhet fjalë për një rrjet të mirëorganizuar të trafikut të lëndëve narkotike në vendet skandinave (baza në Danimarkë) dhe Europë, gjatë viteve 2012-2019, teksa fitimet silleshin me mjete transporti në Shqipëri, e drejtuar nga i dënuari Jetmir Kastrati, që mbante edhe identitetin Sokol Krasnici. Mes sekuestrimeve të Beqiraj-Kastrati ishte edhe një pulari në Shkodër, me vlerë 1,5 mln euro.
Komente
