Lezha po përballet çdo ditë me trafik të rënduar, si në rrugët nacionale që kalojnë përmes saj, ashtu edhe brenda qytetit. Situata bëhet edhe më e vështirë gjatë verës, kur emigrantët dhe turistët e shumtë rrisin ndjeshëm numrin e automjeteve në qarkullim. Sipas nënkryetarit të Bashkisë, Fatjon Zefi, zgjidhja e këtij problemi kërkon ndërhyrje të planifikuara dhe investime afatgjata.
Dy projektet madhore që pritet të lehtësojnë qarkullimin janë bypass-i i Shëngjinit dhe rruga Milot–Balldren. Por deri në realizimin e tyre, Bashkia synon të bëjë ndryshime të menjëhershme në infrastrukturën rrugore, te cilat përfshijnë vendosjen e sensit unik në disa akse të qytetit, instalimin e sinjalistikës së re, kamerave të monitorimit dhe orientimin më të saktë të trafikut.
“Sezoni turistik në Shëngjin dhe Tales ndikon në trafikun e qytetit të Lezhës. Ajo që mund të bëj bashkia është një investim që mund të ndikojë në përmiirësimin e qarkullimit, ku mes tyre është ndërhyrja në sinjalistikë, vendosjen e disa kamerave simulatore që ndihmojnë në matjen e trafikut. Sezoni i ardhshëm turistik do të na gjejë më mirë”, tha Fatjon Zefi.
Për të ndihmuar sadopak në lehtësimin e qarkullimit rrugor brenda qytetit të Lezhes do të ketë një riorganizim dhe të Policisë Bashkiake, e cila aktualisht nuk e përballon dot fluksin e lartë, sidomos në sezonin turistik.
Komente
