Mbrojtësi i kombëtares shqiptare, Kevin Haveri është emri më i ri që Torino do firmosë në merkaton e janarit. 21-vjeçari prej një sezoni është pjesë e Riminit në Serie C të futbollit italian, teksa drejtori sportiv i kësaj skuadre, Davide Vagnati ka konfirmuar marrëveshjen dhe se janari do jetë muaji i firmës për talentin shqiptar.
"Kam një takim me Torinos në janar për të përcaktuar marrëveshjen e transferimit. Marrëveshja tashmë është vendosur prej disa kohësh, ka ardhur koha të mbyllet. Pastaj Torino do të na thotë nëse do ta marrin menjëherë, ose do ta japin në huazim ose do ta lënë këtu", tha Davide Vagnati.
Haveri luan në fashën e majtë të mbrojtjes, teksa ka qenë pjesë e moshave të Shqipërisë para se ish-trajneri Edy Reja ta grumbullonte në ekipin A disa muaj më parë. Me vlerë 200 mijë euro në treg, Rimini shpreson që ta shesë për një shifër më të lartë. Me Riminin, Haveri ka kontratë deri në verën e 2025. Nëse gjithçka zyrtarizohet, Haveri do jetë futbollisti shqiptar i radhës që firmos në Serie A.
