Presidenti i Shteteve të Bashkuara, Donald Trump dhe zëvendës presidenti Mike Pence u takuan të hënën në mbrëmje për herë të parë, pas protestave të dhunshme të mërkurës së kaluar.
Dhuna e 6 janarit ka ndodhu në kohën ku Mike Pence po drejtonte seancën e certifikimit të fitores së Joe Bidenit në zgjedhjet presidenciale të 3 nëntorit, në Kongresin amerikan.
Lajmi u dha për mediat nga një zyrtar i Shtëpisë së Bardhë, i cili theksoi se Pence nuk ka ndërmend t’i nënshtrohet kërkesës së demokratëve për aktivizimin e Amendamentit 25 të Kushtetutës, i cili do ta shpallte Trumpin të paaftë për kryerjen e detyrave presidenciale.
Trump dhe Pence “përsëritën se ata që thyen ligjin dhe sulmuan Kongresin javën e kaluar, nuk përfaqësojnë lëvizjen ‘Amerika e para’, të mbështetur nga 75 milionë amerikanë”, tha zyrtari.
Dyshja “u zotua se do ta vazhdojë punën në emër të vendit, për pjesën e mbetur të mandatit”, shtoi zyrtari.
Pence raportohet se ka qenë i zemëruar me Trumpin, i cili i ka nxitur mbështetësit që të marshojnë drejt Kongresit, me pretendime të pabazuara për mashtrime në zgjedhje, në anën tjetër edhe Trump ka qenë i acaruar me Pence, duke thënë se ai nuk ka pasur guxim të kthejë mbrapsht rezultatin e zgjedhjeve.
Demokratët e Dhomës së Përfaqësuesve kanë prezantuar një rezolutë për gjykimin e Trumpit, nëse Pence dhe kabineti nuk e heqin atë nga detyra ose nuk e shtyjnë të japë dorëheqje, të mërkurën ata kanë paralajmëruar se do ta votojnë kërkesën për shkarkim të Trump në Dhomën e përfaqësuesve.
