Presidenti amerikan Donald Trump, nga samiti i NATO-s në Bruksel, ku marrin pjesë gjithë liderët e vendeve anëtare, ka rihapur edhe njëherë debatin për mbrojtjen. Trump ka thënë se vendet anëtare të NATO, paguajnë shumë pak për shpenzimet e aleancës. Sipas tij, këto vende duhet të paguajnë rreth 4% të Prodhimit të Brendshëm Bruto, ose GDP-së.
"Shumë vende nuk paguajnë atë që duhet," tha ai. "Dhe, sinqerisht, shumë vende na kanë borxh shumë para për shumë vite. Unë jam i shqetësuar, sepse Shteteve të Bashkuara u është dashur të paguajnë për ta. Pra, nëse kthehesh mbrapa 10 apo 20 vite, shikon se na detyrohen një shumë të madhe parash”.
Trump ka thënë se shifra prej 2% që jepet aktualisht nga vendet anëtare është shumë pak. Shtëpia e Bardhë ka konfirmuar kërkesën e Trump, raporton The Guardian.
NATO si një gurthemeli për sigurinë në botë që nga viti 1949, nuk ka një rregullore për anëtarësim dhe detyrime. Aleanca nuk parashikon abonim vjetor.