Presidenti i SHBA-së, Donald Trump, ka lëshuar atë që ai e quajti një “paralajmërim të fundit” për Hamasin për të liruar pengjet që mbahen në Gaza.
“Unë po i dërgoj Izraelit gjithçka që i nevojitet për të përfunduar punën, asnjë anëtar i Hamasit nuk do të jetë i sigurt nëse nuk bëni siç them unë,” tha Trump në një postim të gjatë në platformën e tij “Truth Social”.
Kjo vjen vetëm disa orë pasi Shtëpia e Bardhë konfirmoi se po zhvillon bisedime të drejtpërdrejta me Hamasin për pengjet.
Uashingtoni deri më tani ka shmangur angazhimin e drejtpërdrejtë me grupin dhe ka një politikë të gjatë të SHBA-së kundër të paturit kontakt të drejtpërdrejtë me entitetet që i liston si organizata terroriste.
Në postimin e tij në mediat sociale, Trump tha se Hamasi do të përballej me pasoja ferri nëse pengjet nuk liroheshin, ndërsa nuk specifikoi natyrën e mbështetjes që po i dërgonte Izraelit.
“Lërini të gjithë pengjet tani, jo më vonë, dhe kthejini menjëherë të gjithë trupat e pajetë të njerëzve që keni vrarë, ose gjithçka mbaron për ju. Për drejtuesit, tani është koha për të lënë Gazën, ndërsa ju keni ende një shans,” shtoi ai.
Trump u tregua i ashpër edhe me civilët. “Gjithashtu, për popullin e Gazës: Një e ardhme e bukur pret, por jo nëse mbani pengje. Nëse e bëni, ju jeni të VDEKUR!”, shkroi ai.
Nuk është hera e parë që Trump kërcënon Hamasin. Në dhjetor ai paralajmëroi të njejtën gjë.
Postimi erdhi pasi Trump u takua me një grup pengjesh në Shtëpinë e Bardhë, të cilët ishin liruar së fundmi sipas armëpushimit, shkroi BBC.
Ndërkohë, sekretarja e shtypit e Shtëpisë së Bardhë Karoline Leavitt konfirmoi se SHBA ka negociuar drejtpërdrejt me Hamasin në përpjekje për të siguruar lirimin e pengjeve.
“Izraeli ishte konsultuar përpara bisedimeve”, shtoi ajo.
Komente
