Presidenti i SHBA-së Donald Trump ka deklaruar se administrata e tij po vazhdon negociatat për të adresuar barrierat tregtare me Indinë dhe se do të bisedojë me kryeministrin Narendra Modi, në një shenjë të një rivendosjeje pas javësh fërkimesh diplomatike.
Trump, tha se mezi priste të fliste me Modin në "javët e ardhshme" dhe shprehu optimizëm se ata mund të finalizonin një marrëveshje tregtare .
"Jam i sigurt se nuk do të ketë vështirësi në arritjen e një përfundimi të suksesshëm për të dy Vendet tona të Mëdha", tha ai në një postim në rrjetet sociale.
Ndërkohë Modi gjithashtu në një postim në rrjetet sociale nënvizoi se Uashingtoni dhe Nju Delhi "janë miq të ngushtë dhe partnerë".
Ai tha se ekipet nga të dy vendet po punojnë për të përfunduar diskutimet tregtare sa më shpejt të jetë e mundur.
"Mezi pres të flas me Presidentin Trump. Do të punojmë së bashku për të siguruar një të ardhme më të ndritur dhe më të begatë për të dy popujt tanë", tha Modi.
Komentet e fundit nga të dy udhëheqësit i rritën aksionet e Indisë me mbi 0.5%.
Trump kishte premtuar për muaj të tërë se të dyja palët ishin afër arritjes së një marrëveshjeje tregtare, vetëm për t’i dyfishuar tarifat e reja doganore mbi importet indiane në 50%, duke ngritur pyetje në lidhje me të ardhmen e marrëdhënieve SHBA-Indi, të cilat ishin forcuar vitet e fundit, përfshirë edhe gjatë mandatit të parë të Trump.
Gjatë javëve të fundit, Trump dhe zyrtarët e tij të lartë e kanë kritikuar Indinë për blerjen e naftës nga Rusia dhe kanë thënë se India po financon luftën në Ukrainë, një akuzë që Nju Delhi e mohon.
Fërkimet diplomatike me SHBA-në kanë përkuar me afrimin e Indisë me Kinën. Në fund të muajit të kaluar, Modi bëri vizitën e tij të parë në Kinë në shtatë vjet për një samit të organizuar nga Presidenti kinez Xi Jinping - teksa u pa shumë i afërt me Presidentin rus Vladimir Putin./Reuters
Komente
