Pas sulmit ndaj muzeut dhe sistemit amerikan të operës, Donald Trump hakmerret ndaj kinemasë dhe kompanive të huaja të prodhimit. Presidenti i Shteteve të Bashkuara njoftoi përmes rrjetit të tij social Truth Social synimin për të vendosur tarifa 100% mbi filmat e prodhuar jashtë vendit. Trump tha se ka autorizuar Departamentin e Tregtisë dhe Përfaqësuesin e Tregtisë së SHBA-së që të fillojnë menjëherë zbatimin e këtyre tarifave, megjithëse nuk dha detaje mbi mënyrën se si do të veprohet.
Presidenti kritikoi zhvendosjen e prodhimit filmik jashtë vendit. “Kjo,” tha ai, “është një përpjekje e organizuar nga vende të tjera dhe, për këtë arsye, një kërcënim për sigurinë kombëtare. Mbi të gjitha, është një operacion komunikimi dhe propagande.”
Ky propozim vjen pas raportimeve se një prej “ambasadorëve të tij të veçantë” në Hollywood, aktori Jon Voight, po punon për një plan për të shpëtuar industrinë amerikane të argëtimit.
Trump shkroi gjithashtu në Truth: “Industria amerikane e filmit po vdes me një ritëm alarmues. Vende të tjera po ofrojnë lloj-lloj stimujsh për të tërhequr regjisorët dhe studiot tona që të largohen nga Shtetet e Bashkuara. Hollywoodi dhe shumë zona të tjera brenda vendit po shkatërrohen.”
Ai e përshkroi këtë situatë si një sulm të menduar mirë ndaj SHBA-së për ta dobësuar vendin dhe për të zhvendosur vendet e punës jashtë. “Prandaj,” shtoi ai, “kam autorizuar Departamentin e Tregtisë dhe Përfaqësuesin e Tregtisë të fillojnë menjëherë procesin për vendosjen e një tarife 100% për të gjithë filmat që hyjnë në vend dhe që janë prodhuar jashtë Amerikës. Ne duam që filmat të prodhohen sërish në SHBA.”
Në javët e fundit, Voight është takuar me përfaqësues të sindikatave dhe drejtues të industrisë së filmit, të cilët kërkojnë stimuj tatimorë për të nxitur prodhimin vendas. Sindikatat kanë kohë që kërkojnë lehtësira fiskale në nivel federal për të përkrahur punën brenda vendit. Gjatë viteve të fundit, ekipet e prodhimit kanë parë një rënie të mundësive për punë.
Megjithatë, studiot janë të shqetësuara se Trump mund të vendosë kufizime për xhirimet jashtë vendit, pasi stimujt bujarë në vende si Britania e Madhe, Kanadaja dhe Australia kanë tërhequr për një kohë të gjatë projekte të mëdha të Hollywoodit. Studiot janë bërë të varura nga këto stimuj për të ulur kostot. Trump nuk përmendi në mënyrë specifike prodhimet televizive, të cilat në shumicën e rasteve realizohen në Kanada. Edhe platformat online si Netflix dhe Max kanë zhvendosur pjesë të mëdha të prodhimit jashtë SHBA-së./La Repubblica
Komente
