Pse të kënaqesh duke shkuar në Mars, kur mund të përpiqesh të marrësh Perandorinë? Elon Musk nuk ka humbur kohë: pas sondazhit të menjëhershëm në X dhe pasi mori 65% “po” nga më shumë se një milion përdorues, miliarderi nga Afrika e Jugut ka regjistruar partinë e tij të re pranë Komisionit Federal Zgjedhor. Partia e Amerikës ka lindur zyrtarisht. Selia ndodhet në adresën e zyrave të SpaceX, kompania e tij hapësinore, në numrin 1 të Rocket Rd, Hawthorne, Kaliforni. Arkëtari dhe firmëtari i aktit është Vaibhav Taneja, drejtor i një tjetër kompanie të lidhur me perandorinë e Musk-ut, asaj të makinave elektrike Tesla.
Partia e Amerikës lind si një parti-biznes, por rrezikon të vërë në rrezik bizneset e tjera të miliarderit. Qeveria amerikane i ka këshilluar të qëndrojë larg politikës. “Bordet drejtuese të kompanive të tij – tha për CNN sekretari amerikan i Thesarit, Scott Bessent – duan që ai të rikthehet t’i drejtojë ato. Me shumë gjasa nuk janë të kënaqur nga ky njoftim”. Përplasja me Steve Bannon përfundon mes fyerjesh. Në podcast-in e tij, ideologu i MAGA e sulmoi Musk-un duke e quajtur: “Budalla, palaço. Një jo-amerikan që themelon Partinë e Amerikës. I dashur, ti nuk je amerikan, je afrikan-jugor. Duhet të dëbohesh”. Reagimi i ashpër i Musk-ut: “I trashë, alkoolik, derr: këtë herë do përfundosh në burg dhe do rrish gjatë, duhet të paguash për një jetë me krime”.
Në rrjetet sociale kineze, ndërkohë, ka shpërthyer mania për Musk-un, me hashtag-un kushtuar Partia e Amerikës të përdorur nga mbi dyzet milionë përdorues. “Është thjesht një ide për miliarderët“, komentoi Bernie Sanders, senator dhe lider i së majtës demokrate.
Shtëpia e Bardhë mund të përpiqet të ndalë në nisje ambicien politike të Musk-ut, duke goditur ashpër kompanitë e tij, përpara se të hyjnë në lojë sondazhet. Në mbrëmjen e njoftimit të Musk-ut, Trump mbeti çuditërisht i heshtur, por dje goditi fort: “Të nisësh një parti të tretë është qesharake, nuk ka funksionuar kurrë, sjell vetëm konfuzion: ne kemi qenë gjithmonë një sistem me dy parti”.
Por Musk nuk mjaftohet më me nisjen e raketave, ai do të rishkruajë skenarin e demokracisë amerikane. Nëse mbetet besnik ndaj vetes, Musk do t’i përzgjedhë kandidatët në X, ndoshta me primare publike në stilin e Lëvizjes Pesë Yjet, por me shifra shumë më të mëdha, përmes një llogarie me mbi 220 milionë ndjekës. Për fondet e fushatës do të kujdeset vetë ai, njeriu më i pasur në botë me një pasuri prej 405 miliardë dollarësh.
Musk do të synojë qarqet elektorale ku republikanët mund të humbasin. Në X ai foli për operacione “me lazer”, për të goditur partinë e manjatit dhe “për t’i rikthyer lirinë Amerikës. Mënyra se si synojmë të thyejmë sistemin – shpjegoi ai për ndjekësit – është përmes një varianti të asaj që Epaminonda përdori për të shkatërruar mitin e pathyeshmërisë së Spartës në Leutra: forcë e përqendruar maksimalisht në një pikë të vetme të fushëbetejës”.
Në shënjestër janë zgjedhjet e mesmandatit në nëntor 2026, ku konservatorët rrezikojnë të humbasin Dhomën e Përfaqësuesve. Në mbrëmjen e shpalljes së Musk-ut, presidenti mbeti çuditërisht në heshtje, por ka nga ata që thonë se ishte i tërbuar dhe gati për hakmarrje. Një zëdhënës i Shtëpisë së Bardhë, Harrison Fields, u mjaftua të kujtonte se “Trump e ka bashkuar Partinë Republikane“. Një tjetër miliarder, Mark Cuban, më parë shumë kritik ndaj Musk-ut, i ka këshilluar të kontaktojë një organizatë jofitimprurëse që promovon aksesin e drejtë në procesin zgjedhor:“Ata do të ndihmojnë në qendrat e votimit“.
Sa vota mund të zhvendosë Partia e Amerikës? Programi i tij me inteligjencë artificiale flet për një 5-10% të elektoratit, të marrë kryesisht nga republikanët e zhgënjyer. Duke marrë parasysh harmoninë e dikurshme, Musk nuk propozohet si një alternativë ndaj trumpizmit, por si një mutacion gjenetik, më pragmatik dhe teknologjik, por jo më pak narcisist. Por Trump nuk do të presë ta shohë duke u rritur./La Repubblica
Komente
