Uashington — Presidenti Trump deklaroi të premten se drejtoresha e tij e inteligjencës kombëtare, Tulsi Gabbard, “gaboi” kur dëshmoi në muajin mars se Irani nuk po ndërton një armë bërthamore – duke shënuar herën e dytë brenda javës që presidenti hedh poshtë vlerësimin e zyrtares që vetë zgjodhi.
Shtëpia e Bardhë deklaroi këtë javë se Irani ka gjithçka që i nevojitet për të ndërtuar një armë bërthamore dhe se i duhet vetëm miratimi nga Udhëheqësi Suprem i Iranit, me mundësinë për të përgatitur një armë brenda disa javësh. Z. Trump tha se Irani ishte “shumë pranë” ndërtimit të një arme bërthamore.
Në mars, Gabbard dëshmoi në Kongres se SHBA “vazhdon të vlerësojë se Irani nuk po ndërton një armë bërthamore dhe se Udhëheqësi Suprem Khamenei nuk ka autorizuar një program armësh bërthamore që ai e kishte pezulluar që në vitin 2003.” Më pas, Gabbard këmbënguli se ajo dhe presidenti ndodhen “në të njëjtën linjë”.
Të premten, presidenti hodhi poshtë publikisht vlerësimin e shërbimeve të tij të inteligjencës në lidhje me Iranin, dhe në mënyrë të veçantë deklaratat e Gabbard, ndërsa Shtëpia e Bardhë njoftoi se presidenti do të vendosë brenda dy javësh nëse do t’i bashkohet sulmeve të Izraelit ndaj Iranit.
Kur presidenti mbërriti të premten në Bedminster, Nju Xhersi, një gazetar e pyeti: “Çfarë informacioni inteligjent keni që dëshmon se Irani po ndërton një armë bërthamore? Shërbimet tuaja të inteligjencës thonë se nuk ka prova për këtë në këtë moment.”
“Po atëherë, shërbimet e mia të inteligjencës janë gabim,” u përgjigj Trump. “Kush e ka thënë këtë në komunitetin e inteligjencës?”
“Drejtoresha juaj e inteligjencës kombëtare, Tulsi Gabbard,” u përgjigj gazetari.
“Gabim është,” tha Trump, duke kaluar te pyetja tjetër.
Presidenti kishte hedhur poshtë dëshminë e Gabbard edhe më herët gjatë javës, gjatë kthimit nga samiti i G7 në Kanada. Një gazetar i kujtoi se Gabbard kishte dëshmuar në mars se komuniteti i inteligjencës nuk kishte prova që Irani po ndërtonte armë bërthamore.
“Nuk më intereson çfarë ka thënë ajo,” u përgjigj presidenti për gazetarët në bordin e Air Force One. “Unë mendoj se ata ishin shumë afër ta kishin një të tillë.”
Në një postim në platformën X, Gabbard akuzoi mediat se “kanë nxjerrë dëshminë time jashtë kontekstit”.
“Amerika ka informacion që Irani është në pikën kur mund të prodhojë një armë bërthamore brenda javësh ose muajsh, nëse vendos të përfundojë montimin,” shkroi Gabbard.
Zëvendëspresidenti JD Vance shkroi në X të martën se “dëshmia e Tulsit ishte në mars, dhe shumë gjëra kanë ndryshuar që atëherë.”
Presidenti është informuar për rreziqet dhe përfitimet e një sulmi ndaj Fordow, vendi më i mbrojtur i Iranit për aktivitetet bërthamore, kanë bërë të ditur disa burime për CBS News gjatë kësaj jave. Mendësia e presidentit është se neutralizimi i tij është i domosdoshëm për shkak të rrezikut që Irani të prodhojë armë në një kohë të shkurtër.
Zëdhënësja e Shtëpisë së Bardhë, Karoline Leavitt, u tha gazetarëve të enjten se presidenti do të marrë vendimin brenda dy javësh nëse do të bashkohet me sulmet izraelite, duke lejuar ndërkohë që të shihen mundësitë diplomatike.
“Në bazë të faktit se ka një mundësi reale që të ketë ose jo negociata me Iranin në të ardhmen e afërt, unë do të marr vendimin tim brenda dy javëve nëse do të veprojmë ose jo,” thuhej në deklaratën që Leavitt lexoi në konferencën për shtyp në Shtëpinë e Bardhë.
Ministri i Jashtëm i Iranit u takua të premten në Gjenevë me një grup diplomatësh evropianë.
I pyetur të premten nëse një sulm mund të ndodhte edhe para përfundimit të afatit dyjavor, presidenti tha: “Po i jap atyre një periudhë kohe. Do të shohim se sa do të zgjasë ajo periudhë. Por dy javë do të ishte maksimumi.”
Komente
