Kryetari i PS për Tiranën, Erion Veliaj deklaroi nga Kombinati se Tirana e braktisi dje protestën e opozitës. Në një takim me strukturat e PS në Njësinë 6, Veliaj tha se në pamundësi për të mbushur sheshet me njerëz, opozita solli në Tiranë autobusë bosh.
“Kur shikon protestën e tyre të mbushur me ekrane led, si të ishte koncerti i Dua Lipës, harron kush është në opozitë. Por, ata vijnë nga Gjiri i Lalzit, vizitojnë Tiranën për protestë dhe sigurisht, do të kthehen sërish në Gjirin e Lalzit. Të vetmit që gënjehen janë qytetarët që vijnë nga rrethet në Tiranë me autobusë gjysmë bosh”, tha Veliaj. Ai ironizoi edhe deklaratat e PD, që bënin thirrje për pjesëmarrje në protestë.
“E patë atë dhëndrin tonë që kemi në PD? Kur e panë se nuk kishte dalë njeri nga Tirana, doli t’u bënte një thirrje të fundit. Tha: Të çohemi ne tironsit, se Sahati i Tiranës është mbushur me hotele me 5 yje. A thua se kjo është gjë e keqe! Edhe e thonë këta që u ngeci ora 4 vjet. Kur Partia Demokratike dhe LSI-ja drejtonte Tiranën, Sahati i Tiranës nuk punoi 4 vjet. Kur ty të ngec edhe ora e qytetit, simbolika më e madhe ritmit që duhet të kapim, është turp i madh”, u shpreh ai.
Veliaj deklaroi se Tirana e braktisi opozitën në protestë, pasi puna e bërë gjatë këtyre viteve tregon qartë diferencën mes dy forcave. Sipas tij, Kombinati jo vetëm që nuk e vuan më problemin e djegies së plehrave në Sharrë, por Tirana ka edhe 40 shkolla të reja.
“Thanë që Kombinati duhet të dalë në protest për plehrat. Në kohën e tyre nuk bëje dot një takim jashtë se të përfshinte reja veshtullore e plehrave që digjeshin në Sharrë, një re kancerogjene mbi qytet. Sot është dita me natën. I kërkojnë Kombinatit të dalë në protestë këta që legalizuan shtëpi brenda në varrezat e Sharrës, pastaj habiten pse nuk u del Tirana në protestë. Tirana nuk ju del në protestë se Tiranës nuk i ka ngecur ora, përkundrazi po kap orën e humbur. Thanë të dalë edhe Tirana në protestë se autobusët nga rrethet na erdhën gjysmat bosh. Të dalë Tirana për arsimin? Ne kemi bërë 40 shkolla të reja, ata nuk bënë dot një shkollë kur kishin edhe qeverinë, edhe bashkinë”, u shpreh ai.
Teksa bëri krahasim mes opozitës dhe mazhorancës, Veliaj solli në vëmendje 21 janarin, ku 4 protestues të pafajshëm u vranë në Bulevard. Ai u shpreh se kur qeveris PS-ja, nuk preket asnjë protestues. “Qartazi kriminelët kthehen në vendin e krimit, se nuk e harrojnë dot 21 janarin. Nuk e harrojmë as ne! Është mirë të kujtojnë se janë në rrugën që mbushën me gjak, duke vrarë njerëz. Duhet të kujtojnë se janë në një hapësirë ku derdhej gjak shqiptari për pushtet. Ne jemi sot për t’ju shërbyer të gjithëve, pa i ndarë, as të majtë, as të djathtë, as të partive dhe partiçkave të tyre. Përkundrazi, për t’ju thënë se kur qeveris PS-ja, jo vetëm nuk guxojnë të prekin njeri, por në protesta dëmtohen më shumë policë, sesa protestues”, tha Veliaj, teksa shtoi se filozofia e PS është bashkimi dhe puna plot pasion për qytetin.
Kryetari i Bashkisë së Tiranës, Erion Veliaj ka ironizuar Kryetaren e LSI, Monika Kryemadhi, në lidhje me akuzat e saj mbi procesin e rindërtimit. Nga Kombinati, ku zhvilloi një takim me strukturat e PS, Veliaj tha se shqetësimi i vetëm i Kryemadhit është interesi i saj politik.
“Kombinati ka pritur gjatë për çështjen e tërmetit dhe unë dua t’ju shoh në sy e t’ju them të vërtetën: Kemi bërë 22 gjyqe. Këtu vinte Monika Kryemadhi - që ka shtëpi e dhoma edhe për macet, ka edhe banjo për macet, por nuk ka një dhomë për një familje të prekur nga tërmeti - dhe i cyste njerëzit, u thoshte çojeni në gjyq, merrni masa bllokimi. Po pse më bllokon të mos bëj shtëpitë e njerëzve? Çfarë duhet të bënim? Duhet të fitonim 22 gjyqet dhe i fituam 22 me 0, se progresi nuk ndalet”, u shpreh ai.
Veliaj shprehu bindjen se Bashkia e Tiranës do të fitojë edhe gjyqin për të zhbllokuar punën për heqjen e ndërtimeve pa leje te varrezat e Sharrës.
Sekretari i Përgjithshëm i PS Damian Gjiknuri deklaron se fitorja e PS në zgjedhjet e ardhshme vendore është konsolidimi i arritjeve që janë bërë deri më tani. Në një takim me strukturat e PS në Njësinë 6 bashkë me Kryetarin e PS për Tiranën Erion Veliaj, Gjiknuri komentoi dhe protestën e djeshme të opozitës.
“Ne jemi dëshmitarë të ndryshimeve që kanë ndodhur, po këto nuk kanë ardhur rastësisht. Nuk duhet t’i lemë asnjëherë në mes ato. Kujt duhet t’ia lëmë, atyre që dalin në shesh? Ata dalin se ai tjetri do të legjitimojë veten e tij, atë hall ka. Jo se pret të fitojë pushtetin nga rruga. Nganjëherë madje më duken të koordinuara, se del proteston Opozita në Maqedoni kundër integrimit Europian, duket sikur ka lidhje. Kështu bën dhe ky zotëria jonë këtu në Tiranë. Nuk dua të bëj konspiracione, po rastësitë nuk janë gjëra që duhen shmangur. Pra ka një rastësi me një plan konkret, megjithatë unë nuk dua të bëj nga ato spekulimet e mëdha po pikërisht këtë lloj Opozite kemi. Ne duhet t’i themi ndal me forcën tonë duke organizuar partinë”, tha Gjiknuri.
