Pas tunelit të Llogorasë, Kryeministri Edi Rama ka paralajmëruar se së shpejti do të jetë gati një tjetër tunel, ai i Murrizit në Rrugën e Arbrit.
Përmes një postimi në rrjetet sociale ai thotë se punimet në tunelin e Murrizit do të përfundojnë së shpejti dhe se në 31 dhjetor pritet inaugurimi i kësaj vepre infrastrukturore.
Në postimin që paralajmëron hapjen e tunelit, kryeministri Rama shihet së bashku me ministrin e drejtësisë Ulsi Manja i cili më herët ka qenë drejtues politik në qarkun e Dibrës.
'Në Livadh, Himarë, beteja e tuneleve mes Murrizit dhe Llogarasë, ku dibrani në krahun tim i thotë vlonjatit në pasqyrën e ajfonit, “Gzoju për verë me tunelin 2 or ka Tirona, se erdh 31 dhjetori e do t’marr n’Dibër t’shofësh ça osht gzimi dimrit nji or larg Tirone.'- shkruan Rama.
Tuneli i Murrizit është i gjatë 3.7 kilometra dhe punimet kanë nisur në maj të 2019-ës. Ritmet kanë qenë të ngadalta për shkak të gjeologjisë së vështirë, dhe rrëshqitjes së dherave.
