Protestat e dhunshme dhe situata e acaruar politike duket se nuk kanë ndikuar në trendin pozitiv të sektorit të turizmit shqiptar. Një raport i Forumit Ekonomik Botëror e ka konfirmuar këtë, duke bërë të ditur se në dy vitet e fundit Shqipëria ka bërë hapa të rëndësishëm përpara në konkurrueshmërinë e industrisë turistike, duke u ngjitur 12 vende në klasifikimin botëror. Ndërkohë që klasifikohej e 98-ta në vitin 2017, tani Shqipëria, sipas Ëorld Economic Forum, renditet e 86-ta mes 140 shteteve të marra në anlizë.
Raporti i hartuar nga organizata prestigjioze me bazë në Zvicër niset në vlerësimin e tij nga të dhënat e analizuara prej ekspertëve të Bankës Botërore dhe Organizatës Botërore të Turizmit. Renditja lidhur me performancën e turizmit në një vend të caktuar përcaktohet nga kuadri rregullator ligjor dhe institucional, mjedisi dhe infrastruktura e të bërit biznes, si dhe burimet njerëzore, kulturore e natyrore.
Sipas raportit industria e turizmit në vendin tonë vlerësohet në rritje të vazhdueshme, duke kaluar nga 3.2 pikë në vitin 2013, në 3.4 dy vjet më vonë dhe 3.6 në 2019-ën. Tanimë vendi ynë është më mirë se Maqedonia e Veriut (renditja 101; vlerësimi 3.4) dhe Bosnje Hercegovina (renditja 105; vlerësimi 3.3).
( Kliko këtu ) Raporti i Plotë për turizmin në 2019
Pavarësisht nga trazirat e këtij viti, siguria është vlerësuar më shumë se gjithshka, duke marrë 5.8 pikë, nga 7 të mundshme. Vlerësimet e tjera pozitive kanë të bëjnë me higjienën (5.3), çmimet konkurruese (5.3), burimet njerëzore (5.1) dhe prioriteti i sektorit (5).
Ndërkohë, nota më të dobëta kanë marrë burimet kulturore dhe udhëtimet për biznes (vlerësuar 1.2), infrastruktura e transportit ajror (2.1), burimet natyrore (2.9), infrastruktura portuale (3.1) dhe shërbimet dhe infrastruktura e turizmit (4).
