Receta e parë: Petanik me fasule
Brumi:
500 gr miell
300 ml ujë, kripë
2 lgj vaj
Kripë
Mbushja:
400 gr fasule të ziera
50 gr vaj ulliri
50 gr gjalp
Kripë, piper i zi
Përgatitja:
Fillimisht përgatisim brumin, e ndajmë në 10 kuleçë, e mbulojmë dhe e lemë të pushojë për 20 minuta.
Më pas hapim kuleçët në peta dhe i vendosim në furrë për t’i pjekur në temperaturën 170 gradë Celsius për 3-5 minuta. Gjysmat e petëve (5-6 copë) i copëtojmë.
Lyejmë tavën me pak vaj shtrojmë 2 petë duke i spërkatur me vaj ose gjalpë. Fasulet e ziera me pak lëng të trashë i trazojmë me 4 lugë vaj ulliri, kripë dhe piper të zi dhe pasi të shtrojmë 2-3 petë i spërkasim me fasule dhe pak lëng. Vendosim më pas copëzat e petëve të pjekura dhe përsëri mbushje me fasule. E spërkasim me pak yndyrë dhee mbulojmë petanikun me 2 petë të tjera. Në fund e spërkasim përsëri me yndyrë, e presim dhe e vendosim në furrë në temperaturën 200 gradë Celsius për 25 minuta.
Receta e dytë: Pilaf bullguri me perime
Përbërësit:
Vaj
1 kokërr qepë
1 spec jeshil
1 spec i kuq
1 patëllxhan
2 domate
2 filxhan çaji bullgur
4 filxhan çaji ujë
Kripë
Përgatitja:
Në një tenxhere vendosim 2-3 lugë gjelle vaj ulliri. Shtojmë në të qepën e prerë në kubikë të vegjël dhe e kaurdisim mirë deri sa të zbutet.
Shtojmë në të një spec jeshil të prerë dhe atë në kubikë të vegjël duke vazhduar ta kaurdidim së bashku . Shtojmë një spec të kuq të prerë në kubikë të vegjël dhe vazhdojmë kaurdisjne duke shtuar një patëllxhan të prerë në kubikë me brinjë 1 cm. Vazhdojmë përsëri kaurdisjen në temperaturë mesatare. Shtojmë domatet e qëruara në kubikë dhe i trazojmë duke i lënë që domatja të avullojë lëngun e saj. I vendosim kapakun për 3-5 minuta që domatja të ziejë pak.
Në fund shtojmë bullgurin, e trazojmë sa kokrrat e bullgurit të vishen pak me yndyrë dhe shtojmë ujin e nxehtë, kripë dhe e lëmë pilafin të ziejë për 15-20 minuta në temperaturë nën mesatare. Kur uji të jetë përthithur komplet, e mbulojmë tenxheren me një pecetë e më pas vendosim kapakun. Në fund mund të thërrmojmë me pirun dhe e servirim të ngrohtë.
Komente
