Rreth 17 muaj në qeli ka zgjatur dënimi me 2 vite e 20 ditë burgim i ish kryetarit të Bashkisë së Himarës, Jorgo Goro për tjetërsimin e 10 mijë metrave katrorë toke në Gjilekë të Himarës. Pas përllogaritjeve edhe të periudhës së paraburgimit, Prokuroria e Posaçme ka urdhërimin lirimin e tij më 12 gusht.
Më 22 korrik Apeli i GJKKO konfirmoi dënimin me 3 vite e 1 muajt burgim për “shpërdorim detyre” në dy raste dhe mosdeklarim pasurie, dënim i cili për shkak të gjykimit të shkurtuar iu konvertua në 2 vite e 20 ditë burg.
Duke qenë se Goro ndodhej në qeli që prej 23 marsit 2024, prej paraburgimit deri në 22 korrik kur vendimi mori fuqinë e formës së prerë, ish kreu i Bashkisë së Himarës kishte vuajtur 1 vit e 11 muaj e 29 ditë. 22 ditët e mbetura i shleu deri më 12 gusht.
Goro u dënua pasi përcolli pranë organeve kompetente dokumente të falsifikuara duke bërë të mundur regjistrimin e një toke bujqësore pronë shtet, në favor të Stavri Mëhillit, në kërkim. Pas kësaj procedure, toka u shit te një shoqëri private me përfaqësues ish-deputetin Artan Gaçin. Në total përllogaritet rreth 10 mijë m2 tokë e tjetërsuar në 2 sipërfaqe të ndryshme, për të cilën GJKKO vendosi konfiskimin për llogari të shtetit. Gjithashtu gjykata konfiskoi edhe apartamentin rreth 81 m katrorë që ishte në emër të biznesmenit Gentian Sula si pronë e fshehur e ish-kryebashkiakut.
Jorgo Goro ka edhe një tjetër dosje penale në ngarkim, për tjetërsimin e një toke në Livadhë të Himarës, për të cilën u dënua me 2 vite burg nga GJKKO në shkallën e parë më 30 korrik 2025, por nuk ka marrë ende formën e prerë. Për këtë dënim çështja ndodhet në apel dhe ndaj Goros nuk ekziston masë sigurie. Për këtë arsye ish kryebashkiku do të shijojë lirinë deri në një vendimmarrje të Apelit.
Komente
