Ditët e fundit emigrantët e paligjshëm shqiptarë në Britaninë e Madhe janë kthyer në lajmin kryesor sa i takon situatës së krijuar në Britaninë e Madhe. Polemika të shumta u krijuan pas reagimit të kryeministrit Edi Rama ndaj deklaratave të ministres së Brendshme britanike lidhur me përfshirjen e emigrantëve shqiptarë në veprimtari kriminale.
Për këtë arsye, media britanike, Daily Mail ka kryer një vëzhgim në një prej lagjeve ku ka një numër të lartë të emigrantëve shqiptarë. Mes tyre janë kontaktuar punonjës dhe pronarë shqiptarë të kafeneve lokale, si dhe emigrantë shqiptarë të ardhur së fundmi me gomone.
Ata kanë shprehur ankesa kundrejt qeverisë britanike për gjuhën raciste dhe etiketimet e përdorura kundrejt tyre duke i përcaktuar si “kriminelë” apo “gangsterë”.
"Emigrantët shqiptarë që jetojnë në Britaninë e Madhe akuzuan sot qeverinë se i ka bërë ata ‘koja turku’ për politikën ‘e prishur’ të emigracionit të Britanisë – dhe kritikuan pretendimet e Home Office se ata po ‘luanin’ sistemin. Ata thanë se ishin larguar nga Shqipëria për një jetë më të mirë në Britani për të punuar shumë dhe për të paguar taksat e tyre – ndërsa këmbëngulnin se nuk pretendonin përfitime dhe nuk ishin ‘gangsterë apo hajdutë’.
Duke folur jashtë një kafeneje në veri të Londrës, burrat pohuan se ishin viktima të racizmit të hapur dhe ishin shënjestruar qëllimisht nga qeveria britanike për të larguar vëmendjen nga trajtimi i dobët i kalimeve të Kanalit të migrantëve. Ervis Abdullaj, 39 vjeç, pronar i 01 Café Bar dhe një nga rreth 150,000 shqiptarë që jetojnë në MB, protestoi: “Shqiptarët po vijnë këtu për një jetë më të mirë. Çfarë nuk shkon me këtë? Shumë njerëz kanë ardhur nga vende të tjera, por askush nuk ankohet për ta.
“Shqipëria është një vend i bukur, por ka shumë korrupsion dhe dhunë atje. Shumë shqiptarë po ikin nga kushtet e tmerrshme dhe jeta e tyre është në rrezik. Mund të mos ketë një luftë atje, por nuk është një vend i sigurt.
Zoti Abdullaj, i cili erdhi në Britani në vitin 2014 përmes kanaleve zyrtare tha: “Unë nuk kalova ilegalisht në një varkë dhe kam bërë një jetë të mirë për veten time në Britani. Por nëse njerëzit janë të dëshpëruar për të ardhur këtu kështu, atëherë duhet të ketë një arsye të mirë.
“Unë punoj pothuajse 18 orë në ditë dhe si shumë shqiptarë në Britaninë e Madhe dua të kem një jetë të mirë për veten time. Qeveria britanike thjesht po përpiqet të na fajësojë ne për problemet e saj. Nuk është faji ynë që nuk mund të bashkohet dhe të bëjë diçka për krizën e emigrantëve. Kështu që është më e lehtë t'i lidhësh të gjitha me shqiptarët".
Bandat shqiptare në Britaninë e Madhe janë akuzuar për kontrabandën e njerëzve dhe kontrollin e pjesëve të mëdha të tregjeve të marijuanës dhe kokainës në vend. Dritan Doda, 49 vjeç, i cili drejton një kompani ndërtimi, këmbënguli: “A jemi ne i vetmi komunitet në MB që përfshihemi në kriminalitet dhe trafik droge? Unë nuk mendoj kështu.
“Kam 25 vjet që jam në Britani dhe nuk e di pse tani shqiptarët fajësohen për gjithçka. Ne jemi një komunitet i vogël në Mbretërinë e Bashkuar, por aktualisht jemi duke u fajësuar për të gjitha problemet e mëdha. Është racizëm për mendimin tim, sepse është më e lehtë për Qeverinë të na fajësojë ne sesa të marrë përgjegjësi".
Ndërtuesi Ermond Dena, 50 vjeç, i cili ka qenë në Britani për 10 vitet e fundit shtoi: “Shumë komunitete kanë kriminelë dhe tregtarë droge. Pse të fokusohemi vetëm te Shqipëria", shkruhet në artikull të DailyMail.
Çështja e akuzave ndaj emigrantëve shqiptarë që jetojnë në Britaninë e Madhe është diskutuar së fundmi edhe gjatë samitit të djeshëm në Kuadër të Procesit të Berlinit, ku kryeministri Edi Rama ka kritikuar deklaratat e ministres së Brendshme britanike, Suela Braveman e cila e ka konsideruar numrin e lartë të shqiptarëve që po mbërrinin ilegalisht në Mbretërinë e Bashkuar si një “pushtim”.
Komente
ju vafte mbare vetem mos harroni te mos pergojoni kot me kot vendin tuaj se ulni veten para vendasve. varferi ka ne shqiperi, pasiguri e krim ka por te tille ka dhe ne angli ndaj mos percmoni vendin tuaj e mos hidhni shifra kot me kot edhe per pagat, iket si iket puna juaj por mos villni vrer ndaj vendit, nuk ju pelqen Rama, votoni apo kthehuni e merruni me politike por te llapesh per Ramen kur ne kohen e nongratqoftelargut ishim merre merre nuk te ben dinjitoz vetem nese ke patur parajsen me nongratqoftelargun, Rama sot eshte neser nuk eshte, vendi mbetet ndaj edhe te palarat tona mos ti nxjerrim per buje ne mejdan
Përgjigju