Katër të rinj gjermanë janë arrestuar në Shëngjin pasi u kapën me doza kanabisi. Policia thotë se gjermanët, të moshave 23, 25, 27 dhe 28-vjeç, u konstatuan nga shërbimet e policisë kufitare pranë një automjeti tip “Dacia”, në të cilën u gjet sasia e kanabisit, që dyshohet se ata e posedonin për shitje në zona.
Ata u vunë në pranga dhe policia i ka referuar në Prokurorinë e Lezhës me akuzën për veprën penale “Prodhim dhe shitje e narkotikëve”.
"Posedonin lëndë narkotike kanabis, me qëllim shitjen në doza, kapen në flagrancë dhe vihen në pranga 4 shtetas gjermanë.
Sekuestrohen sasia e lëndës narkotike dhe automjeti që ata përdornin.
Shërbimet e Policisë Kufitare Shëngjin, në bashkëpunim me specialistët e Seksionit për Hetimin e Narkotikëve, në vijim të punës për goditjen e veprimtarive kriminale në fushën e narkotikëve, goditën një rast të shitjes së lëndëve narkotike, në doza.
Për këtë rast u arrestuan shtetasit gjermanë: L. H., 28 vjeç, L. S., 25 vjeç, S. H., 27 vjeç, dhe M. R., 23 vjeç, banues në Gjermani.
Këta shtetas u konstatuan nga shërbimet e Policisë Kufitare, në Shëngjin, pranë një automjeti tip “Dacia”, në të cilin u gjet një sasi lënde e dyshuar narkotike Cannabis Sativa, që dyshohet se ata e posedonin me qëllim shitjen në doza.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme, për veprën penale “Prodhimi dhe shitja e narkotikëve”.", njofton policia.
Komente
