Sot, në një atmosferë të zymtë nga dhimbja dhe lotët, i jepet lamtumira e fundit kapitenit Arben Anamali, i shpallur Dëshmor i Atdheut pas aktit të jashtëzakonshëm të sakrificës që i mori jetën teksa shpëtoi dy të huaj nga mbytja.
Në ceremoninë mortore, familjarë, miq, përfaqësues të Bashkisë Shkodër dhe qytetarë të shumtë nderuan jetën e një njeriu që u shqua për humanizëm, guxim dhe përkushtim.
Mes lotësh, bashkëshortja Najada Anamali, tregoi për mediat se bashkëshorti i saj ishte njeri i jashtëzakonshem aq sa i dha edhe jelekun e tij të shpëtimit, turistëve.
“Është një dhimbje shumë e madhe për familjen tonë. I ka ndihmuar të gjithë, derisa në fund dha edhe jetën e tij. Lajmin e vdekjes e mora nga një kolege e tij, nuk e mendova se kishte bërë një aksident të tillë”, tha mes lotësh bashkëshortja e tij.
Edhe nipi i tij, Mirsad Isufi, shprehu dhimbjen dhe krenarinë për figurën e Arbenit në këtë ditë të rëndë për familjen
Në homazhe ishin të pranishëm edhe përfaqësues të Bashkisë Shkodër, ndërsa Presidenti i Republikës, Bajram Begaj, dërgoi një letër ngushëllimi për familjen Anamali, duke vlerësuar lart aktin e tij fisnik dhe duke shprehur solidaritetin e institucionit të Presidencës.
Arben Anamali, 51 vjeç, ndërroi jetë më 8 korrik pasi u hodh në ujë për të shpëtuar dy turistë izraelitë që kishin rrezikuar të mbyteshin në liqenin e Shkodrës. Ai arriti t’i shpëtojë ata, por nuk u kthye më në anijen që drejtonte me pasion e përkushtim.
Sot, ai përcillet në banesën e fundit, por mbetet përjetësisht në kujtesën e një qyteti të tërë si simbol i humanizmit .
Komente
