Përmes një urdhri të pak ditëve me parë, policia e Shkodrës ka ndaluar lëvizjen e banorëve të komunitetit rom me motoçikleta dhe triçikla, të cilët kështu sigurojnë bukën e gojës. Me këto mjete ata mbledhin kanaçe dhe materiale metalike, ku me pas nga shitja e tyre sigurojnë të ardhurat minimale për jetesë. Në pamundësi për të pasur një punë tjetër, romët janë kundër këtij vendimi dhe për këtë ata kanë dalë në protestë.
Drejtori i Policisë së Shkodrës, Vehbi Bushati, pavarësisht protestës, nuk jep shpresë për romët se vendimi mund të pezullohet, por thotë se po punohet për të gjetur një zgjidhje. Banorët e komunitetit rom dhe egjiptian në Shkodër shpeshherë janë shprehur në media se diskrimonohen, nuk gjejnë punë dhe nuk u respektohen të drejtat. Ata jetojnë në disa banesa afër kalasë së qytetit, që vetëm emrin kanë të tillë.
