Tiranë- Një 39-vjeçar i shumëkërkuar është kapur teksa fshihej në Greqi dhe u ekstradua ditën e sotme (26 prill) nga Interpol Tirana.
I ekstraduari është i riu korçar Marinel Demiri, i dënuar për veprën penale të plagosjes së rëndë me dashje, pasi është përfshirë në një konflikt ku më pas ka humbur jetën në spital edhe një i moshuar që ishte plagosur rëndë.
“Në vijim të bashkëpunimit të Drejtorisë së Interpolit me zyrat homologe, për kapjen dhe ekstradimin e personave të shpallur në kërkim ndërkombëtar, është arrestuar në Greqi shtetasi shqiptar Marinel Demiri, 39 vjeç, banues në Pojan, Korçë”, thuhet në njoftimin zyrtar të Policisë së Shtetit.
Referuar dosjes hetimore, 39-vjeçari u arrestua nga autoritetet policore greke me qëllim ekstradimin drejt Shqipërisë, në zbatim të urdhër-arrestit ndërkombëtar të lëshuar nga Drejtoria e Interpolit, pasi Gjykata e Apelit Tiranë e ka dënuar me 5 vjet e 6 muaj burgim, për veprën penale “plagosja e rëndë me dashje”.
Demirit i kanë ngelur për të vuajtur dhe 4 vjet, 5 muaj e 18 ditë.
Nga hetimet rezulton se shtetasi Marinel Demiri, është përfshirë në një konflikti me sende të forta, në fshatin Pojan, gjatë të cilit ka humbur jetën shtetasi A. Z., 75 vjeç, i cili kishte ndërhyrë për të ndihmuar djalin e tij, gjatë konfliktit me të rinjtë.
Komente
