DURRËS- Një ndërtesë 4-katëshe në qytetin e Durrësit, e cila ishte e shpallur e pabanueshme dhe e rrezikshme nga tërmeti 26 nëntorit është shembur ditën e sotme me shpërthim të kontrolluar.
Burime zyrtare nga Inspektorati Kombëtar i Mbrojtjes së Territorit (IKMT) i thanë Shqiptarja.com se për shembjen e saj janë përdorur rreth 2 kg eksploziv që u vendosën në 100 furnela (vrima) të hapura në trupin e tij.
Objekti katër katësh ishte në ndërtim e sipër dhe asnjë nga katet nuk ishte e banueshme. Si pasojë e dëmeve të shumta të marra nga ajo lëkundje tragjike dhe rrezikshmërisë që përbënte për banesat e tjera për rreth, ajo u shemb me shpërthim të kontrolluar.
Kjo nuk është godina e parë që shembet me shpërthim të kontrolluar. Pas inspektimeve të bëra, godinat e shpallura të pabanueshme dhe që përbëjnë rrezik për banorët dhe ndërtesat e tjera përreth, janë shembur me shpërthim të kontrolluar.
Ky është momenti kur banesa 4-katëshe është shembur nga IKMT. Për shembjen e saj janë përdorur 2 kg eksploziv.
