Ilaria Sula 22-vjeçarja e cila u vra nga ish i dashuri në Itali u përcoll dje (7 prill) për në banesën e fundit nga rreth 3 mijë persona.
Ceremonia mortore për 22-vjeçaren u zhvillua në Terni, qytezën ku familja Sula banon prej vitesh, pranë Romës nga ku i dhanë lamtumirën vajzës së tyre të vrarë në një krim që tronditi jo vetëm qytetin e saj, por mbarë Italinë dhe opinionin publik.
Me dhjetëra kurora me lule, mesazhe prekëse dhe pankarta u vendosën përpara pallatit ku jetonte Ilaria.
"Për Ilarian dhe për të gjitha viktimat e tjera: mjaft më dhunës ndaj grave." - kjo ishte pankarta e vendosur nga grupi "Intaccati", tifozët ultras të skuadrës Ternana, përballë shtëpisë së familjes së Ilaria Sulës në viale dello Stadio, në Terni.
Detaje të reja janë zbardhur nga dëshmia e ish- të dashurit të studentes shqiptare Ilaria Sula në Itali, Mark Simson, i cili e goditi me thikë, teksa bashkëpunëtore ishte dhe nëna e 23-vjeçarit, e cila dëshmoi se ndihmoi në pastrimin e njollave të gjakut nga shtëpia dhe fshehjen e trupit.
Së fundmi, Il Messaggero ka zbërthyer dëshminë e autorit, i cili tregoi se çfarë e shtyu atë në krimin makabër. Autori tregoi se situata ndryshoi kur Ilaria i kërkoi që të shihet notat e tij në shkollë. Ai tha se nuk e pranonte dot ndarjen dhe pse të gjithë miqtë e tij i kishin thënë që të hiqte dorë.
Më pas ata vazhduan të takoheshin edhe për dhjetë ditë të tjera edhe pse ajo dukej më e ftohtë dhe më e shkëputur.
“Isha gati që të luftoja që Ilaria të kthehej si e dashura ime. Ne jemi takuar në vitin 2023 dhe më 30 prill të atij viti konfirmuam lidhjen tonë. Ne kishim një marrëdhënie normale si çdo çift me ulje-ngritjet tona. Situata ndryshoi kur Ilaria më kërkoi të shihte notat e provimit të universitetit rreth dy-tre muaj më parë. Ky ka qenë gjithmonë një problem i madh për mua, një traumë që më ka ndjekur që nga shkolla fillore. Gjithmonë kam pasur ankth për sa i përket performancës time përpara prindërve. Ilaria më dha ultimatum se nëse nuk ia tregoja, atëherë do më linte. Ilaria ishte e paqëndrueshme. Herë më trajtonte si të dashur dhe herë si një mik të thjeshtë”, tha ai në dëshminë e tij.
Komente
