Largimi i flamurit të Kosovës nga organizatorët serbë në kongresin e UEFA-s dhe më pas djegia e tij nga huliganët në Beograd, është shndërruar në temë më të rëndësishme sesa vetë vlera e mbledhjes së institucionit më të rëndësishëm të futbollit në kontinent. Për Report TV, gazetari nga Kosova Shkumbin Pireva, thotë se po me aq faj sa Serbia, është edhe UEFA.
“Ky lëshim i UEFA-s nuk është dashur të ndodhë, pasi është organizatore e kongresit dhe t’ia lë në dorë shtetit mikpritës, Serbisë, të bëjë këto veprime është e patolerueshme dhe e pafalshme. Në këtë rast vetë UEFA ka thyer parimet bazë që është barazia mes të secilit anëtarë,”-u shpreh Pireva.
Federata e Futbollit të Kosovës, që ashtu si edhe ajo e Shqipërisë, e vijuan të qetë kongresin pas këtij incidenti, reagoi pas largimit të flamurit dhe djegies së tij, duke thënë se do të ankohet në UEFA.
“Reagimi i Federatës së Futbollit të Kosovës ka qenë i vakët sepse është dashur të bëjë më të madhe për heqjen e simboleve. Si duket edhe federata, duke marrë parasysh notat e protestave të bërë në të kaluarën si me Rumaninë ashtu edhe Serbinë, që nuk janë marrë në konsideratë, nuk kanë dashur t’i prishin punë vetes në UEFA,”-tha gazetari Pireva.
Vendosja e flamurit të Kosovës fillimisht në kongresin e mbajtur në Beograd, bëri shumë bujë, si shenjë e njohjes së Kosovës nga Serbia, por çudia nuk zgjati shumë, pasi pas pak orësh, flamuri u hoq. Ironike dhe hipokrite në të njëjtën kohë është fakti se në kongres, presidenti i UEFA-s Aleksandër Ceferin, u shpreh se organizimi i Evropianit U-21 mes Shqipërisë dhe Serbisë tregon se sporti mund të thyejë barriera.
Komente
Pas heqies te flamurit te Kosoves,delegacioni i Kosoves dhe i Shqiperise nuk duhet te qendronin me aty.Flamuri esht simbol i kombit,(shtetit)dhe djegia e tij nga huliganet fajson shtetin Serb,UEF-en dhe FIFA-n.Ai veprim eshte kunder cdo bashkepunimi me keto organizma.Le te prononcohet Z.Duka e jo thjesht te marre parat.
Përgjigju