"Furnizimet me gaz rus përmes Ukrainës janë ndërprerë në orën 8:00 sipas orës së Moskës" (ora 6:00 në Shqipëri), deklaroi mëngjesin e sotëm kompania Gazprom.
Sipas një komunikate të shpërndarë nga Gazprom dhe cituar nga agjencia e lajmeve Tass, kompania thekson: "Duke qenë se Kievi ka refuzuar në mënyrë të përsëritur dhe të qartë të zgjasë marrëveshjet për këtë çështje me Rusinë, kompania ka humbur sot aftësinë teknike dhe ligjore për të mundësuar transitin e gazit përmes Ukrainës".
Kompania ukrainase Naftogaz refuzoi të rinovojë kontratën pesëvjeçare me kompaninë ruse Gazprom.
Kryeministri Sllovak Robert Fico deklaroi se ndërprerja e transitit të gazit në Ukrainë do të ketë një ndikim "drastik" për vendet e Bashkimit Evropian, por jo për Rusinë.
Lideri sllovak prorus theksoi se fundi i transitit do t’i kushtojë Sllovakisë qindra miliona euro nga humbja e të ardhurave të transitit dhe tarifat më të larta për importimin e gazit të tjera, dhe ka shtuar se kjo mund të sjellë gjithashtu rritjen e çmimeve të gazit dhe elektricitetit në Europë.
Që nga fillimi i pushtimit të Ukrainës nga Moska në shkurt 2022, Bashkimi Evropian ka kërkuar të diversifikojë furnizimet e tij me energji dhe të zvogëlojë varësinë e tij nga Rusia. Sipas Këshillit Evropian, importet e gazit të tubacioneve në Bashkimin Evropian nga Rusia janë zvogëluar në mënyrë drastike, duke rënë nga mbi 40% në 2021 në rreth 8% në 2023.
Pas mbylljes së rrugës përmes Ukrainës, Rusia do të ketë vetëm një mënyrë më shumë për të ofruar gaz nëpërmjet tubacionit në Evropë: gazsjellësi TurkStream që kalon përmes Turqisë në Bullgari.
Vitin e kaluar, gjiganti i gazit në pronësi të Kremlinit, Gazprom, i cili nënshkroi marrëveshjen e tranzitit me Naftogaz të Ukrainës në vitin 2019, regjistroi një humbje prej 6.9 miliardë dollarësh, e para në më shumë se 20 vjet, për shkak të uljes së shitjeve në Evropë, raportoi Reuters. Kjo përkundër përpjekjeve të saj për të rritur eksportet drejt blerësit të ri Kinë.
Komente
