Kompania ukrainase e shpërndarjes së energjisë elektrike Ukrenergo ka vendosur orare të reja për ndërprerjet e energjisë elektrike në rajonet më të prekura nga sulmet ruse në infrastrukturën energjetike.
Sipas udhëzimeve të reja, ndërprerjet e energjisë elektrike variojnë nga ora 11:00 deri në 23:00 - raporton agjencia e lajmeve RBC-Ukraina. Ukrenergo shpjegoi se zgjatja e orarit të ndërprerjes është për shkak të situatës së vështirë të sistemit energjetik pas sulmeve masive ruse ndaj termocentraleve. Ditën e djeshme (22 qershor) u njoftua një zgjatje e orarit të ndërprerjes nga ora 16:00 deri në mesnatë, ndërsa sot u zgjat edhe me 2 orë të tjera.
Energjiizimi i infrastrukturave kritike, të cilat kryejnë funksionin e mbështetjes jetike për popullatën, nuk është i kufizuar, specifikoi kompania.
Rusia ka nisur tri raketa drejt rajonit të Kievit në orët e para të 23 qershorit, teksa thuhet se tre persona kanë vdekur dhe më shumë se pesëdhjetë të tjerë janë plagosur nga bombardimet ruse në qytetin e Kharkivit, vetëm një ditë më parë.
Presidenti ukrainas, Volodymyr Zelensky ka kërkuar përsëri mbështetjen e aleatëve për të ndalur terrorin rus.
"Vetëm sot, luftëtarët tanë tashmë kanë rrëzuar dy raketa ruse Kalibr. Dje e bënë me 12 raketa dhe 13 dronë. Dhe kështu me radhë, çdo natë dhe çdo ditë. Terrorizmi rus nuk po ngadalësohet dhe prandaj ne duhet të rrisim presionin, me çdo kusht dhe së bashku me partnerët tanë.
Ne jemi mjaft të vendosur për të eliminuar terroristët, ndaj kemi nevojë që partnerët tanë të jenë po aq të vendosur. Ne mund ta ndalojmë Rusinë. Ne do ta bëjmë atë, së bashku me të gjithë ata në botë vlerësojnë jetën", shkruan Zelensky në një postim në X.
