Ulja e numrit të njerëzve që kërkojnë të shkojnë me gomone drejt Britanisë së Madhe përmes kanalit të La Mansh ka sjellë përgjysmimin e çmimeve nga ana e trafikantëve të bandave kurde, raporton The Telegraf.
Bandat kurde e kanë ulur çmimin për një vend në një gomone të vogël drejt Mbretërisë së Bashkuar në 1500 paund, tarifa më e lirë për këtë lloj udhëtimi që prej 2018. Një çmim i tillë përbën më shumë se gjysmën e çmimit të fundit prej 3,500 paund dhe mbi një të tretën e tarifës mesatare prej 5,000 paund që ishte vitin e kaluar.
Sipas Telegraf një lëvizje e tillë, vjen pasi numri i shqiptarëve që kalojnë La Manshin pësoi rënie me 90% pas marrëveshjes që Londra nënshkroi me Shqipërinë dhjetorin e vitit të kaluar për një riatdhesim të shpejtë të klandestinëve.
Të hënën, shifrat e Home Office treguan se gati 24,000 emigrantë kanë kaluar deri më tani Kanalin këtë vit - pasi 500 u zbuluan në bordin e dhjetë gomoneve që mbërritën gjatë fundjavës.
Numri është ulur me rreth 20% në vitin 2022, kryesisht për shkak të rënies së numrit të shqiptarëve, megjithëse ka pasur rritje të numrit të afganëve, turqve dhe indianëve.
