Secili ka krijuar një veshje të punuar me dorë, duke pasur si motiv lulen e vet të preferuar. Janë 20 fëmijë të kursit të skenografisë dhe kostumografisë pranë Qendrës Kombëtare Kulturore të Fëmijëve, të cilët kanë sjellë sfilatën me 20 kostume, “Unë jam një lule” në Teatrin e Kukullave në Tiranë.
Për veshjet është kujdesur mësuesja e skenografisë dhe kostumografisë, Sergina Neziri, e cila është dhe ideatorja e aktivitetit.
“Janë fëmijë të cilët kanë gati tre vite në kurs. Gjatë gjithë kohës kanë qenë të impenjuar. Nuk është sfilata e parë. Na është dashur gati dy muaj punë. Sigurisht kjo është një punë e lodhshme dhe jo aq e thjeshtë sa në dukje, sepse çdo gjë është e konceptuar, e krijuar, e ideuar, e realizuar nga duart e fëmijëve. Puna e dorës gjithmonë kërkon shumë kohë. Ndërkohë që fëmijët punonin janë filmuar edhe në video gjatë gjithë procesit.”, - thotë Neziri për "Report TV".
Sfilata çelet me një fustan me motiv lulediellin, konceptuar dhe realizuar nga Grejsi Lita, e cila ka krijuar të gjitha lulet e skenografisë.
“Fustanin kam përzgjedhur ta bëj të gjithin me lulen e diellit, një lule që simbolizon diellin, pra, pa të nuk ka jetë. Gjithë punimi është i bërë me dorë, me letra punëdore me ngjyra të ndryshme. Siç mund ta shikoni ka dekore të ndryshme, nga lulet e verdha te portokallitë, disa janë më të çelura, disa pak më të mbyllura.”, - shprehet Lita.
Grejsi thotë se në të ardhmen ëndërron të bëhet kostumografe dhe stiliste, një dëshirë që e kanë edhe shumë shoqe të saj të kursit.
Bora Kastrati, e veshur me një fustan me motiv lulen e zambakut ka realizuar gjithashtu edhe skenografinë e spektaklit.
“Lulja që kam zgjedhur është lulja e zambakut, sepse është një lule që tregon bukurinë dhe pastërtinë. E gjitha është e punuar me dorë. Ka marrë secila petale kohën e vet. Për të krijuar fustanin është dashur rreth dy muaj kohë se dhe letra e përdorur është e vështirë për t’u gjendur dhe ndërtuar në këtë format. Përmes skenografisë kam paralajmëruar ardhjen e pranverës.”, - tregon Kastrati.
Sfilata mbyllet me një kostum që shfaq para publikut diellin.
“Jam 13 vjeç dhe copa që kam përdorur është copë e verdhë, duke e mbushur brenda me pambuk, duke e qepur, me karton. Kemi mbuluar kartonin me copë të verdhë dhe e kemi qepur. Kemi marrë edhe litar të verdhë që ta lidhim drejt trupit dhe një pelerinë të verdhë.”, - thotë Klaus Alla, që në sfilatë ka sjellë Diellin.
Fëmijët në sfilatë i përkasin moshës 10-13 vjeçare, ndërsa për shfaqjen kanë punuar edhe regjisorja Klaudia Hila dhe koreografi Fatjon Sulstarova, njëherësh përgjegjës i Qendrës Kulturore.
Komente
