Yulia Navalnaya, bashkëshortja e liderit të opozitës ruse, Alexei Navalny, ka deklaruar se dy laboratorë të huaj kanë konfirmuar se burri i saj është helmuar, pas analizave të mostrave biologjike që u kontrabanduan fshehurazi jashtë Rusisë.
Navalnaya, e cila jeton jashtë vendit, ka postuar një video në rrjetin social X, ku tha se materiali biologjik i Navalny ishte kontrabanduar jashtë Rusisë në vitin 2024 dhe më pas ishte ekzaminuar nga dy laboratorë të ndryshëm.
"Këto laboratorë në dy shtete të ndryshme arritën në të njëjtin përfundim: Alexei u vra. Më saktësisht, ai u helmua. Rezultatet janë të rëndësishme për publikun dhe duhet të bëhen publike. Të gjithë ne e meritojmë të dimë të vërtetën”, tha Navalnaya, duke kërkuar që të publikoheshin gjetjet e dy laboratorëve.
Ajo nuk specifikoi se cili helm ishte zbuluar nga laboratorët.
Navalnaya gjithashtu tha se pamjet e kamerave të mbikëqyrjes nga dita e fundit e jetës së burrit të saj ishin zhdukur, megjithëse lideri i opozitës ishte nën mbikëqyrje të vazhdueshme kamerash gjatë gjithë kohës që ishte në burg.
Zëdhënësi i Kremlinit, Dmitry Peskov, tha të mërkurën se nuk ishte në dijeni të deklaratave të Navalnayas.
Navalny vdiq papritur në moshën 47-vjeçare më 16 shkurt 2024, ndërsa mbahej në një burg rreth 64 kilometra në veri të Rrethit Arktik, ku ishte dënuar me dekada burg në një "regjim të veçantë".
Aleatët e Navalny akuzuan disa herë Kremlinin për vrasjen e tij, akuza që Moska i ka hedhur poshtë si të pabaza.
Zyrtarët rusë insistuan se ai vdiq nga një kombinim sëmundjesh, duke përfshirë aritmi të zemrës që u shkaktua nga hipertensioni.
Komente
