Numri i pushuesve po shtohet në Velipojë, sidomos gjatë fundjavës por shqetësim mbetet mungesa e rojeve bregdetare. Në të gjithë gjatësinë e plazhit prej 11 km, kullat e vrojtimit pavarësisht se janë të vendosura nuk kanë roje.
Për pushuesit në plazhin e Velipojës mungesa e rojeve bregdetare shton rrezikun për jetën sidomos tek fëmijët.
Burime nga Bashkia e Shkodrës, thanë për Report TV se subjektet që aplikojnë për stacione plazhi kanë si kusht vendosjen e vrojtuesit. Por sipas bashkisë, kontrollin mbi këto subjekte që nuk respektojnë rregullat duhet ta ushtrojë Agjencia e Bregdetit.
Ndryshe u shpreh një ditë më parë ministri i Turizmit, Blendi Klosi në Report Tv.
"Të gjithë bashkitë janë të detyruara të sigurojnë pastërtinë dhe jetën e njerëzve"
Ky ping-pong kompetencash mes vendorëve dhe pushtetit qendror po vë në rrezik jetën e pushuesve.
