Lando Norris ka paralajmëruar një sezon të ri me rivalitet në Formula 1. Piloti britanik i McLaren u pozicionua në vendin e dytë të renditjes në edicionin e kaluar, fill pas kampionit Max Verstappen.
Tanimë në prezantimin e makinave të reja, Norris ka thënë se holandezi nuk do e ketë të lehtë pasi makina e re e tyre ka një qasje shumë ambicioze.
“Në letër, makina jonë e re duhet të jetë një hap përpara. Ne e dinim se po fillonim të ndërtonim makinën e re duke u nisur nga një bazë e mire. Zgjodhëm të rrezikonim dhe të merrnim një qasje mjaft ambicioze. Kjo është mënyra e vetme për të bërë përparim të rëndësishëm”, tha Norris.
Më pas piloti shtoi se ka mësuar shumë nga sezoni i fundit dhe duhet të kontrollojë më shumë garën pasi rivaliteti me Max mund t'i nxjerrë nga pista, njëjtë si në xhiron e Austrisë.
“Ndonjëherë jeta merr një drejtim të padëshiruar, por nga botërori i vjetshëm kam mësuar shumë. Max është një shofer agresiv dhe rikuperimi i pikëve ndaj tij ishte pothuajse i pamundur. Shanset që ne të dy të përfundojmë jashtë, si në Austri, ishin të mëdha dhe ai do të kishte vetëm një avantazh”, shtoi britaniku.
Më pas erdhi edhe paralajmërimi për Max Verstappen.
“Ky vit do të jetë ndryshe. Unë do të duhet të jem një shofer i zgjuar dhe nëse më duhet të nxjerr bërrylin për ta ndaluar atë të kalojë, do ta bëj. Nuk do ta lë Max të më parakalojë, do të jetë një betejë e ashpër në pistë brenda limiteve”, tha Norris.
Komente
