Klubi i Futbollit Tirana këtë sezon është për t'u analizuar, kjo për shkak të vendimeve të gabuara që po rrezikojnë edhe vendin e katërt që të çon në "Final 4", zonën e garës për titullin kampion në Superligë.
Këtë të premte Komisioni i Disiplinës dhe Etikës i ka "tërhequr veshin" bardhebluve për shkak të detyrimeve të prapambetura ndaj ish-trajnerit Orges Shehi.
5 tetorin e 2023 KF Tirana vendosi të shkarkonte durrsakun, me klubin që i mëshonte idesë së "pezullimit", për ta penguar të firmoste me ekipe të tjera. Pas disa javësh betejë ligjore në Dhomën e Zgjidhjes së Konflikteve, Shehi firmosi fillimin e këtij viti me Partizanin, duke marrë të drejtën e pagave për pjesën e kontratës që kishte me Tiranën.
Sot Disiplina i dha afat 30 ditor Tiranës për të shlyer borxhet kundër Shehit dhe në rast të një mosreagimi mund të shkohet pse jo edhe në heqje pikësh. Përtej merkatos së bllokuar, te Tirana i kanë shtuar telashet vetes.
Klubi nuk mund të afrojë lojtarë pa shlyer tre emrat që kanë fituar të drejtën për pagat e prapambetura, ndërsa FIFA ka bllokuar merkaton. Në afatin kalimtar të janarit 2024 Tirana nuk mundi të afronte asnjë emër, duke kthyer nga huazimi vetëm sulmuesin Diar Nikqi.
Shitja e Dokës dhe Hasanit bëri që stafi teknik të mos kishte alternativa, me Tiranën që duket se nuk i ka bërë llogaritë si duhet këtë sezon.
Merkato e bllokuar, borxhe të pashlyera, dy trajnerë të ndërruar dhe pa organikë në ekip, i kanë shtuar barrën Erbim Fagut që pranoi të drejtonte ekipin në këtë situatë të vështirë.
Me Tiranën e zyrave që duhet të lëvizë, edhe ajo e fushës duhet të bëjë të njëjtën gjë nëse nuk do të jetë jashtë "Final 4" për një sezon të dështuar. Për mos harruar edhe ndeshjen e parë gjysmëfinale të Kupës së Shqipërisë, humbur 2-0 ndaj Kukësit.
