Max Verstappen kryeson renditjen e pilotëve për këtë sezon në Formula 1 me 255 pikë, 99 më shumë se vendi i dytë që mbahet nga Sergio Perez, shoku i tij i skuadrës Red Bull. Me tetë suksese dhe dhjetë podiume, Verstappen është dukshëm piloti që ka vendosur duart te titulli i tretë kampion, duke dominuar këtë kampionat.
Meksikani Sergio Perez në garën e fundit nuk bëri paraqitje të mira, me Verstappen që nuk ka nguruar ta thumbojë. Kjo ka vendosur në dyshim qëndrimin e tij te Red Bull, ku mund të rikthehet veterani Daniel Ricciardo.
Ai që turbullon edhe më shumë ujërat është Verstappen, që u shpreh: “Nuk e kuptoj paraqitjen e Sergio-s në provat zyrtare, pasi po eliminohet shumë shpejt. Me këtë makinë duhet të jetë në sesionin e tretë. Nuk e di se çfarë nuk shkon me të”.
Pas fitoreve në 6 garat e fundit, Verstappen ka 99 pikë avantazh në renditjen e përgjithshme ndaj Perez, ndaj të cilit hedh disa kunja. “Ne po luftojmë edhe për fitoren e titullit kampion për skuadra, por duke parë situatën aktuale, mendoj se mund t’ia dal edhe vetë t’i fitoj të dy titujt”, tha belgo-holandezi.
