Vetëdorëzohet në polici Ndoc Maçaj, autori i vrasjes me armë zjarri i 61-vjeçarit Piro Prroni mbrëmjen e së enjtes në fshatin Abat të Shalës në Shkodër. 58-vjeçari u paraqit në komisariat rreth orës 02:30 bashkë me armën me të cilën kreu krimin, pas negociatave me drejtorin e policisë së Shkodrës, Gentian Berberi.
Report Tv mëson se Maçaj dhe Prroni, kushërinj me njëri-tjetrin, po pinin në një tavolinë kur ndodhi ngjarja. Prroni u qëllua me një plumb në shpatull, i cili rezultoi fatal. Ende nuk dihen rrethanat dhe motivet e krimit, pasi autori është nën efektin e alkoolit dhe pritet t'i merret dëshmia.
Ndaj autorit rëndon akuza e vrasjes me dashje dhe armëmbajtje pa leje. Në vendin e ngjarjes, policia gjeti dy gëzhoja pistolete si dhe dy mjete prerëse, thikë dhe kmesë.
Sipas raportimeve, më herët, ndërmjet tyreka pasur konflikte të mëparshme lidhur me një tokë në Shalë. Procesi i regjistrimit të pronave që kishte nisur dyshohet të ketë qenë edhe shkak i përplasjes
Njoftimi i policisë:
Dyshohet se vrau me armë zjarri pistoletë, 61-vjeçarin, për motive të dobëta, arrestohet 58-vjeçari, i cili u vetëdorëzua disa orë pas ngjarjes, bashkë me armën e krimit.
Specialistët e Sektorit për Hetimin e Krimeve ndaj Personit vunë në pranga shtetasin N. M., 58 vjeç, për veprat penale “Vrasja me dashje” dhe “Mbajtja pa leje dhe prodhimi i armëve, armëve shpërthyese dhe i municionit”.
Ky dyshohet se dje, në fshatin Abat, Shalë, ka vrarë me armë zjarri pistoletë, për motive të dobëta, shtetasin P. P., 61 vjeç, banues në fshatin Abat.
Shërbimet e Policisë kanë gjetur në vendin e ngjarjes dhe kanë sekuestruar dy gëzhoja pistolete dhe 2 mjete prerëse (thikë dhe kmesë).
Materialet procedurale do t’i kalojnë Prokurorisë, për veprime të mëtejshme.
Komente
