Futbollisti i kombëtares së Ekuadorit, Marco Angulo ka ndërruar jetë në moshën 22-vjeçare. Angulo u përfshi në një aksident në kryeqytetin e Ekuadorit, Quito, më 7 tetor përpara se të dërgohej me urgjencë në spital.
Përplasja me makinë kishte ndodhur në autostradën Rumiñahui në juglindje të Quitos në orën 4:30 të mëngjesit. Ndërsa ishte në spital ai iu nënshtrua një operacioni për të çliruar presionin brenda kokës së tij të shkaktuar nga trauma e pësuar.
Angulo kishte pësuar gjithashtu një kontuzion të mushkërive që kërkonte vendosjen e një tubi në gjoks, megjithëse nuk u gjet asnjë gjakderdhje aktive.Megjithatë, 35 ditë pas përplasjes, më 11 nëntor Angulo u konfirmua se kishte ndërruar jetë nga plagët e rënda.
Angulo luajti për klubin ekuadorian LDU Quito në huazim nga skuadra e MLS amerikane, FC Cincinnati. Mesfushori, i cili bëri debutimin e tij profesional vetëm në vitin 2020, kishte luajtur dy herë me ekipin kombëtar të Ekuadorit. Paraqitja e tij e fundit kishte ardhur në një fitore 2-1 ndaj Australisë në mars 2023.
