Detaje të reja vijojnë të dalin në dritë nga hetimet e kryera mbi vetëvrasjen e 17-vjeçares Irsa Muçollari në Gjirokastër më datë 10 shkurt, ndërsa Prokuroria ka hedhur poshtë pistën e bullizmit si shkakun kryesor të vetëflijimit.
Mësuese të shkollës dhe nxënëse janë pyetur disa herë për të zbardhur më shumë mbi ditën e fundit të shkollës së të ndjerës. Sipas prokurores, ekzistojnë pamje filmike që tregojnë largimin e vajzës në shtëpi dhe momenti i fundit ka qenë ora 14:00. Ndërsa akti i rëndë është bërë rreth orës 16:00. Ndërkaq, telefoni i vajzës mbetet çelësi kryesor për të zbuluar shkakun që e çoi të ndjerën në këtë veprim.
Aktualisht, ky telefon po tentohet të hapet nga ekspertë profesionistë, pasi është i koduar. Në Gjirokastër nuk ka ekspertë për këtë çështje, ndaj ai është çuar në kryeqytet.
Lidhur me letrën e publikuar në media, ajo ka qenë një punim detyre shkollore, i bërë kohë më parë. Nëse do të kishte një letër reale, ajo do t’u jepte mundësi hetuesve ta zbardhnin më lehtë këtë ngjarje të rëndë. Megjithatë, deri më tani janë sekuestruar vetëm dokumente dhe telefonat e tre shoqeve, por ende, në këtë fazë të hetimit, nuk ka një shkak konkret pse vajza kreu vetëvrasjen.
Nuk përjashtohen as problemet familjare, ndërsa janë marrë dy psikologe eksperte nga Tirana për të kuptuar linjën e ndjekur nga e ndjera.
Sa i përket psikologes së përfolur në gjimnazin "Siri Shapllo", ajo nuk e njihte vajzën dhe, madje, nuk është as psikologe, por thjesht mban statusin e punonjëses sociale.
Komente
