Disa nga futbollistët e klubit të Struga Trim dhe Lum në Maqedoninë e Veriut kanë bërë një gjest që po bën xhiron e rrjeteve sociale. Në bashkëpunim me njëri-tjetrin ata kanë ndihmuar një qen që kishte mbetur në ujërat e Drinit të Zi. Në rolin e protagonistit ishte Zija Merxhani që ka rrezikuar duke u afruar në lumë për të kapur qenin që e kishte të pamundur të dilte në tokë.
Në bashkëpunim me Darko Iliskin dhe Prengun, futbollistët kanë bërë që kafsha të jetë shëndoshë e mirë dhe jashtë rrezikut. Video shumë shpejt ka qarkulluar në rrjetet sociale dhe ka marrë vlerësimin me komente pozitive për gjestin e bërë nga futbollistët e Strugës.
Klubi shqiptar që luan në Maqedoninë e Veriut kryeson Superligën e vendit fqinj me 37 pikë pas 17 javësh, teksa duket se futbollistët e këtij ekipi nuk janë të mirë vetëm në fushën e lojës.
