Shkëndija e Tetovës, klubi shqiptar i futbollit në Maqedoninë e Veriut do ketë një stadium me kushte bashkëkohohe. Tanimë ka nisur puna dhe faza e parë është shembja e tribunave në impiantin ekzistues, për rinovimin total.
Sezonin e ri Shkëndija pritet t'i luajë ndeshjet në një stadium alternativ, pasi koha e përllogaritur e ndërtimit të stadiumit të ri do jetë deri në dy vite. Rinovimi është një projekt madhor që do të konkretizohet nga firma “Ecolog” me mbështetjen e Komunës së qytetit. Punimet do të nisin me kapacitet të plotë në muajin qershor, teksa këtë të premte ka nisur shembja e tribunave anësore. Impianti i ri do ketë kapacitet prej 12 mijë vendesh, që mund të presë dhe ndeshje të nivelit ndërkombëtar.
Bëhet fjalë për një rikonstruksion të plotë ku projekti i stadiumit paraqet një strukturë gjigande dhe moderne, në stilin e impianteve më të mira Europiane, qoftë për sa i përket përshtypjes pozitive që krijon fazada e jashme, që e bën stadiumin një atraksion të vërtetë për qytetin.
I ndërtuar dekada më parë sipas stilit ish-jugosllav, stadiumi i Tetovës kishte shfaqur prej kohësh nevojën e punimeve me shumë ambiente të tij që ishin në prag degradimi.
