Ky është momenti i filmuar me kamera infra gjatë natës dhe nga ajri, i garës oqeanike, në ndjekje me helikopter, mes Marinës së Meksikës dhe anijeve-skafe të karteleve të Narcos.
Të paktën 15 anëtarë të narkotrafikut u arrestuan, kurse forcat e rendit dhe detare sekuestruan 7,200 kg drogë (7,2 tonë), në dy ndjekje të veçanta me shpejtësi të lartë. Operacioni është zhvilluar më 23 gusht dhe pamjet u publikuan së fundmi nga “BBC”.
Në një deklaratë, qeveria e Meksikës tha se “me sa duket sekuestrimi i ngarkesës së kokainës, ishte më i madhi i kapur gjatë administrimit të tyre”.
Kokaina e kapur nga marina meksikane
Pamjet e publikuara nga marina tregojnë se si u zhvilluan operacionet në brigjet e Meksikës, në Oqeanin Paqësor.
I pari ndodhej pranë qytetit Manzanillo dhe i dyti afër Lazaro Cardenas. Kartelet e drogës vitet e fundit kanë gjetur si strategji jo vetëm mjetet lundruese me supermotorë të fuqishëm për të rivalizuar forcat e ligjit, por edhe ndërtimin arkitekturoro-inxhinierik të nëndetëseve të posaçme, për t’u bërë “zotët e oqeanit”.
