Banorët e fshatit Baltëz në Fier vuajnë prej dekadash ndotjen e ujit të kolektorit Roskovec - Hoxharë, nga mbetjet inerte, hidrokarburet dhe shkarkimi i ujërave të zeza të qytetit të Fierit, të cilat derdhen në gjithë gjatësinë kolektorit dhe përfundojnë në det.
Në mëngjes dhe mbrëmje ndihet era e rëndë e këtij kolektori, që njihet dhe me emrin “Vija e Ngjalës”. Ndotja ka shkaktuar probleme shëndetësore për banorët e Baltëzës.
"Fëmijët i kemi të sëmurë me infeksione lëkure dhe astmë bronkiale", thanë ata.
Specialisti i Bordit të Kullimit Evatist Kolici ka pohuar se kolektori është pastruar 10 vite më parë në gjithë gjatësinë e tij prej 35 km, ndërsa para 5 vitesh është pastruar vetëm segmenti nga ish- fusha e mbetjeve deri në Roskovec. Pjesa e mbetur ku shtrihen disa fshatra përfshirë dhe Baltëzën nuk është pastruar, por sipas tij nuk përbën rrezik për përmbytje.
Ndërsa inxhinieri teknik i Ndërmarrjes Rajonale të Ujësjellës - Kanalizimeve në Fier, Artur Baxhia tha se po hartohet projekti për ndërtimin e një impianti filtrimi, i cili do të realizohet në bashkëpunim me bankën gjermane për zhvillim (KfW).
Komente
Po t'ju kerkosh llogari,te gjithe /i kane gati/ projektet ne mendje,ose ne leter,por kur vjen puna e zbatimit ne jete,eshte ceshtje tjeter.
Përgjigju