Në kantierin e “Unazës së Madhe” të Tiranës punimet po vijojnë të kryhen me ritme të shpejta. Kështu ka njoftuar sot kryeministri Edi Rama, i cili thotë se ky investim madhor pritet të jetë gati deri në fund të këtij viti.
Teksa ka ndarë disa pamje në facebook, Rama shkruan se ky është një nga projektet më të rëndësishme të infrastrukturës në vend.
“Në kantierin e Unazës së Madhe të Tiranës punimet vijojnë me ritme të mira. Ky investim madhor pritet të jetë gati në fund të këtij viti, duke përmbyllur kështu një ndër projektet më të rëndësishëm të infrastrukturës në vend”, shkruan Rama.
Unaza e Madhe e kryeqytetit përbën një segment prej 27 kilometrash të gjatë.
Ndërtimi i saj lehtëson trafikun brenda Tiranës, ndërsa e lidh kryeqytetin me të gjitha rrugët dalëse kombëtare.
Kjo unazë do të jetë në shërbim të të gjithë automjeteve, të cilat aksesojnë Tiranën nga të gjitha hyrjet jashtë qytetit, si nga Rruga e Arbrit, ashtu edhe nga rruga Tiranë-Elbasan apo Tiranë-Durrës.
