Edhe pse sezonit turistik po i vjen fundi, fluksi i shqiptarëve të Kosovës që udhëtojnë drejt bregdetit shqiptar vazhdon. Në pikën kufitare në Morinë mëngjesin e së shtunës janë krijuar radhë të gjata për të kaluar nga Kosova në Shqipëri.
Shifrat flasin për rreth 20 mijë shqiptarë nga Kosova që i janë drejtuar bregdetit shqiptar vetëm në orët e para të mëngjesit. Me sa duket kosovarët po shfrytëzojnë fundjavën e fundit pasi të hënën në Kosovë, nis viti i ri shkollor dhe administrata shtetërore i kthehet punës, duke përmbyllur në të njëjtën kohë edhe sezonin e pushimeve.
Edhe në Vërmicë, radhë të gjata ka pasur për të hyrë nga Shqipëria në Kosovë, pasi kosovarët kanë përfunduar pushimin javor ose dy javor në bregdetin shqiptar dhe tashmë po kthehen në Kosovë. Por ndryshe nga vitet e kaluara, këtë sezon është vënë re shtim i qytetarëve të Shqipërisë që lëvizin drejt Kosovës, duke vendosur thuajse shenjën e barazimit të fluksit në të dy anët e kufirit në hyrje dhe dalje.
Komente
