Këtë të shtunë erdhën nga diaspora edhe 7971 vota të tjera, 5500 vetëm nga Greqia. Megjithatë nga vendi fqinj mbetet ende një shifër e ulët duke pasur parasysh se mbeten edhe vetëm 2 ditë në dispozicion për të kthyer në Shqipëri zarfet zgjedhore.
Numri total i votave të mbërritura deri tani është mbi 181,500 ose rreth 80% e të gjithë atyre që u regjistruan për të votuar për herë të parë nga jashtë.
Në mesataren e totalit të votave në përqindje janë vendet kryesore të diasporës shqiptare, përveç Greqisë e cila ka sjellë deri më tani 45 mijë e 500 vota nga 68 mijë gjithsej, ose rreth 66%.
Tashmë nuk ka më kohë për të dorëzuar zarfet pranë zyrave të DHL dhe grumbullimi është mbyllur, ndërsa priten edhe 2 fluturime të dielën e 11 majit për të sjellë pakot e fundit. Asnjë votë nuk do të numërohet nëse do të hyjnë në territorin shqiptar pas orës 19:00 të ditës së votimit.
Numërimi i votave të diasporës do të bëhet në bazë qarku. Në momentin kur hapet kutia e parë e një qarku të caktuar për votat në Shqipërisë, atëherë fillon edhe numërimi i votave të diasporës për atë qark.
Në mbarë diasporën shqiptare, mbetën përfundimisht pa u shpërndarë 18 mijë zarfe zgjedhore, ku posta nuk e gjeti votuesin, ose qytetari nuk e gjeti dot zarfin e tij. Ato po kthehen tashmë në Shqipëri.
Të paktën deri më tani mungojnë 45 mijë shqiptarë në diasporë që i kanë marrë zarfet, por nuk ende e kanë kthyer fletën e votimit.
Komente
