Komisioni i Ligjeve e shtyu për të nesër mbledhjen ku do të testohej vullneti i palëve për dialog, përpara se Kodi Zgjedhor të hidhet për votim në seancën e së enjtes. Deputeti i partisë së re politike ‘Djathtas 1912’, Enkelejd Alibeaj, nuk e kurseu ironinë me dy përfaqësuesit politikë të PS-PD për ndryshimet në Kod, Damian Gjiknurin dhe Oerd Bylykbashin.
Klotilda Bushka: E kërkoi Bylykbashi, Gjiknuri, je dakord?
Enkelejd Alibeaj: Dy vëllezërit siamezë nuk po bien dakord, pazari i radhës.
Sot priten të diskutoheshin ndryshimet e rëndësishme në Kodin Zgjedhor për votën e Diasporës për zgjedhjet parlamentare të 11 Majit, të nevojshme për të finalizuar këtë proces për zgjedhësit jashtë Shqipërisë, teksa me akt normativ Qeveria ka shtyrë edhe afatin e skadimit të dokumenteve biometrike.
Aktualisht, PD pranon të votojë vetëm atë nen që nuk i faturon zgjedhësit në diasporë pagesën e postës për votën, por ja kalon të gjitha shtetit.
Por opozita nuk pranon që të afrohen afatet për të prodhuar më shpejt fletën e votimit, duke i vënë kusht për këtë PS-së, të lejojë votimin edhe për ata persona që kanë vetëm dokumente identifikimi të huaja, e jo shqiptare.
Kjo do të vendosë në vështirësi KQZ në, e cila ka apeluar disa herë, se koha e ngushtë, do të lejojë vetëm dërgimin e fletëve të votimit në diasporë, por kthimi i tyre nuk do të bëhet brenda afatit, të orës 19:00, të ditës së votimit më 11 maj.
Deri më tani, në KQZ janë pranuar si votues nga jashtë 115 mijë emigrantë, dhe më shumë se 30 mijë, janë refuzuar.
Celibashi vëren se ka probleme edhe me zgjedhësit brenda vendit. Ai tha sot se nga monitorimi i bërë nga KQZ janë konstatuar vonesa në afishimin e listave të zgjedhësve në disa bashki si dhe procesi i njoftimit të zgjedhësve nuk ka filluar në shumicën e bashkive për shkak të mungesës së fondeve.
Komente
