KURBIN - Vrasja e 67-vjeçarit Dod Mamli mbrëmjen e së hënës në fshatin Vilës të Kurbinit ka ndodhur për çështje pronësie. Falë veprimeve të shpejta hetimore të kryera nën drejtimin e prokurorisë së Lezhës, policia ka arritur të zbardhë ngjarjen, duke identifikuar dhe vënë në pranga autorin e dyshuar.
Ai është Dashnor Tota, 53 vjeç, banor i zonës, ku për kapjen e tij u angazhuan Shërbimet operacionale dhe ato të Forcës Kombëtare të Sigurisë.
'Gjatë operacionit janë ushtruar kontrolle në të gjithë territorin e fshatit ku ndodhi ngjarja dhe në zonat përreth. Si rezultat, mesditën e sotme, është lokalizuar në fshatin Vilëz, është kapur dhe vënë në pranga shtetasi:
D. T., 53 vjeç, banues në fshatin Zhejë, Kurbin.
Në momentin e kapjes nga Policia, këtij shtetasi i është gjetur arma e zjarrit me të cilën dyshohet se ka vrarë 67-vjeçarin D. M., për motive pronësie.', njofton policia.
Ai ishte fshehur në masivin pyjor të zonës ku ka ndodhur ngjarja, ndaj dhe blutë e përqendruan vëmendjen aty, duke monitoruar të gjithë terrenin. Ndërkohë nga veprimet e kryera dhe ekspertiza mjeko-ligjore në trupin e viktimës, rezulton se ai është qëlluar plot gjashtë herë me pistoletë, ku një plumb e ka prekur në kokë dhe dy të tjera në pjesën e gjoksit.
Dod Mamli u gjet nga dy banorë të zonës që po zbrisnin poshtë nga mali të cilët konstatuan trupin e viktimën dhe njoftuan policinë. Familjarët kanë dëshmuar se 67-vjeçaari kishte folur me të vëllanë që ndodhet jashtë vendit rreth orës 16:00 të pasdites dhe mendohet se krimi të ketë ndodhur vetëm pak minuta më vonë.
Në cilësinë e proves materiale janë sekuestruar 6 gëzhoja dhe telefoni i viktimës, ndërsa nga hetimet e kryera rezulton se ai është vrarë pas një konflikti për çështje pronësie.
Bëhet fjalë për një sipërfaqe toke pyjore në trojet e vjetra, ku 67-vjeçari kishte nisur ta punonte, pikërisht në vendin ku u gjet i vrarë. Viktima kishte pak kohë që ishte kthyer nga emigracioni dhe ende nuk dihet nëse ka patur konflikte të mëparshme me bashkëfshatarin e tij Dashnor Tota.
Dod Mamli
Ky është 67-vjeçari Dod Mamli, i cili u ekzekutua një ditë më parë për çështje pronësie në fshatin Vilëz të Kurbinit.
Pas ekspertizës mjeko-ligjore, trupi është tërhequr nga familjarët dhe ceremonia e varrimit do të bëhet të mërkurën e 26 shkurtit në fshatin Zhejë të Kurbinit.
Komente
