Mark Samson, sipas një piste që po hetohet nga hetuesit e Seksionit të Krimeve të Rënda të Policisë së Shtetit, dyshohet se është ndihmuar nga një bashkëpunëtor për të zhdukur trupin e pajetë të Ilaria Sulës. Sipas hetuesve, dikush tjetër mund të ketë marrë makinën për ta afruar pranë banesës në rrugën "Via Homs". Për hetuesit është e vështirë të besohet se i riu mund të ketë transportuar për më shumë se njëqind metra valixhen, nga e cila dilnin këmbët e viktimës, në mes të ditës.
Një element me rëndësi të madhe hetimore janë këpucët e gjetura me njolla gjaku mbi to, të cilat do t’i nënshtrohen analizave të specializuara. 23-vjeçari me origjinë nga Filipinet ndodhet aktualisht në burg, i akuzuar për feminicidin e ish-të dashurës së tij shqiptare, e cila, pasi u vra, u hodh në një greminë në Capranica Prenestina. Nëna e tij, Nosr Manlapaz, akuzohet për bashkëpunim në fshehjen e kufomës. Ajo dyshohet se ka ndihmuar të birin për të pastruar gjurmët e gjakut nga banesa në "Via Homs", pas krimit.
Hipoteza e një bashkëpunëtori tjetër mbetet ende e hapur. Gjithçka lidhet me kohën e ngjarjes. I riu ka deklaruar para hetuesve se e ka vrarë Ilaria Sulën në mëngjesin e 26 marsit, pasi i kishte sjellë mëngjesin në shtrat, në një kohë kur në shtëpi ndodhej vetëm nëna e tij. Por hetuesit dyshojnë se vrasja ka ndodhur natën e 25 marsit, kur në banesë ndodhej edhe babai.
Samson ka shkruar dhe dërguar nga burgu një letër ndjese për prindërit e viktimës së re.
“Po ju shkruaj nga qelia ime, ku do të qëndroj për shumë vite - shkruan ai në letër - Çdo ditë mendoj për krimin e tmerrshëm që kam kryer dhe nuk di çfarë të them, por mbi të gjitha nuk e di çfarë më ndodhi. Është e zakonshme të kërkosh ndjesë për dhimbjen që kam shkaktuar, por dua t’i kërkoj ndjesë Ilarias. Nuk e respektova kur ajo donte të ndahej nga unë. U çmenda nga dhimbja dhe humba kontrollin. Jam i vetëdijshëm që asgjë nga ato që mund të them apo të bëj sot nuk do ta zbusë sadopak dhimbjen e familjes. Nuk po përpiqem të zvogëloj përgjegjësinë time apo të shmang pasojat e veprimit tim. Jam gati të paguaj për fajet e mia pa asnjë justifikim”.
Letra është firmosur nga vetë Mark Samson.
Por sipas familjarëve të Ilaria Sulës, letra nuk mund të fshijë mizorinë e asaj që ka ndodhur. Përmes avokatit të tyre, Giuseppe Sforza, familja i është përgjigjur të riut:
“Teksti i kësaj letre - thotë avokati - duket më shumë si një pasqyrim i vetes së tij, pa asnjë vëmendje reale ndaj peshës së veprës së kryer. Secili ka të drejtën të shkruajë, por gjithashtu prindërit e Ilarias, gjithë familja e saj, vëllai dhe të tjerët, kanë të drejtën të mos i pranojnë këto ndjesa”.
Ndërkohë një nga dëshmitarët kyç, Maher Abouzeid, mik i afërt i Samsonit, ka treguar për sjelljet e çuditshme dhe të dyshimta të këtij të fundit në ditët që pasuan ngjarjen tragjike të ndodhur mes 25 dhe 26 marsit në Romë.
Sipas tij, Marku është një përbindësh.
“Marku nuk ishte tip agresiv, as xheloz. Nuk do ta kisha imagjinuar kurrë një mizori të tillë. Ai është një përbindësh, e përsëris. Gjithmonë e kam menduar si një djalë inteligjent, por të kesh këtë ftohtësi është e frikshme. Më duket sikur jam në një film horror. Por nuk kam asgjë për të fshehur”, thotë miku i tij.
Abouzeid shpjegon se e pa Markun një ditë pas vdekjes së Ilarias. Ky i fundit kishte dorën e fryrë dhe të lënduar, por e justifikoi duke thënë se ishte përleshur me dy djem, diçka që më vonë rezultoi të ishte gënjeshtër.
Sipas mikut të tij, Marku ishte fillimisht i tronditur, por më pas u kthye në sjelljen e tij normale: qeshte, këndonte dhe kërkonte shoqëri femrash.
“Kur e pashë atë natë, dora e tij ishte e fryrë, e kuqe dhe e dhimbshme. Ai mbërriti në makinën e tij rreth mesnatës. Aty ishte edhe një djalë tjetër. E pyetëm se çfarë kishte ndodhur. Ai na tha se një natë më parë ishte përleshur me dy djem, jashtë shtëpisë së Ilarias. Por ishte një gënjeshtër. Ishte vetëm fillimi i gënjeshtrës së tij.
Në fillim ishte i menduar, dukej i tronditur. Por mendova se ishte për shkak të ndarjes me të. Më pas ai u kthye në të njëjtin Mark. Ai që e kisha njohur gjithmonë. Ai qeshte, bënte shaka, këndoi. Patëm një natë dhe morëm dy turiste. Qëndruam me to deri në tre të mëngjesit. Nuk e imagjinoja dot që Ilaria kishte vdekur”, vijon shoku i tij.
Por sjellja që ngjalli dyshime serioze tek Abouzeid, ishte se Marku nuk pranoi të largohej nga makina e tij as për disa orë.
“I sugjerova Markut të linim makinën dhe të shkonim së bashku në shtëpi, sepse duhej të flinte në shtëpinë time - por ai nuk pranoi. Nuk donte ta linte pa mbikëqyrje, as për disa orë. Ishte një reagim i çuditshëm. Ai dukej i tmerruar nga ideja e ndarjes me të. Nuk dua ta mendoj që ishte trupi i Ilarias në të”.
I riu u takua sërish me Markun më 31 mars. Atë ditë, thotë Abouzeid, Samsoni ishte më i heshtur se zakonisht:
“U përpoqa ta bëja të fliste. Mendova se po ndihej keq për të gjithë situatën. Ai më tregoi për denoncimin e zhdukjes, për prindërit e Ilarias, për reagimin e babait të saj, i cili i tronditur në komisariat, e qëlloi me shuplakë dhe e pyeti nëse e dinte ku ishte vajza e tij dhe për nënën e saj, e cila me lot e pyeti: “Më thuaj që nuk di gjë, se nuk ishe ti”. Ai spekuloi se ajo kishte ikur me dikë që e kishte takuar në chat. Ai po luante bllofin. Dhe në mëngjes, kur ishim në shtëpinë time, ai ishte mbyllur në tualet dhe në atë moment në profilin e Ilarias në Instagram u shfaq një histori e re, ku shkruhej: ‘Jam mirë dhe i falënderoj të gjithë’.
Në të njëjtën kohë, ai më tregoi edhe për një letër, për të cilën pretendonte se ishte shkruar nga ajo, e dorëzuar gjatë takimit të tyre të fundit. Një letër e çuditshme, jashtë gjuhës së saj. Ajo tha se donte të largohej, por se e donte atë. Një tjetër e çuditshme e asaj dite ishte një frazë që ai përsëriste shpesh dhe që më ngeli në mendje: ‘Kam frikë nga policia’. Atë mbrëmje na ndaloi një patrullë për një kontroll rutinë, por ai ishte jashtëzakonisht në siklet. Vazhdonte të shikonte pas. Më pas ditët pas zbulimit të trupit dhe arrestimit. Bota ime u shpërbë”.
Ndërkohë, raportime nga Fanpage.it zbulojnë se Mark Samson ka kontaktuar disa vajza në Instagram para dhe pas vrasjes, përfshirë një mesazh më 27 mars. Kjo sjellje ka shtuar dyshimet për ftohtësinë dhe mungesën e pendesës nga ana e tij.
“Më 22 mars, Marku shkroi një mesazh në një faqe në Instagram që synonte të njihte njerëz të rinj, duke pyetur se kush dëshiron të pinte kafe me të. Më pëlqeu postimi dhe më pas folëm privatisht. Një bisedë e shkurtër që më pas nuk u kthye në një takim siç donte ai”, shpjegon vajza.
“Së pari, unë nuk jam një burrë i dobët, jam shumë i ftohtë. Po kaloj një kohë të ndyrë. A doni të bisedoni? S’ka lidhje, mos u shqetëso”, është një nga mesazhet që dyshohet se i ka dërguar Marku të resë. Mesazhi i fundit për vajzën, i cili mbeti pa përgjigje, daton në datën 27 mars: “Ciao, a je akoma jashtë?”. “Mund të kisha hipur në atë makinë ku ka transportuar trupin e ish-të dashurës disa ditë më vonë, nuk e mendoj dot”, komenton e reja.
Sipas Fanpage.it, ajo nuk është e vetmja që është kontaktuar nga Marku para dhe pas vdekjes së Sulës, qoftë edhe me kërkesa për t’u takuar.
Sa i përket hetimeve, dëshmia e vrasësit përmban shumë të panjohura. Samson ka thënë se e ka vendosur trupin e pajetë të vajzës në një valixhe, të cilën më pas e ka mbajtur në krah për 100 metra deri te makina. Megjithatë, më 2 prill, kur zjarrfikësit gjetën valixhen në greminën e Capranica Prenestina-s, këmbët e viktimës dilnin jashtë nga pjesa e poshtme. Ky detaj tregon se valixhja nuk mund të përmbante trupin në mënyrë të plotë.
A është e mundur që Samson të ketë ecur në mes të ditës në lagje me një trup të pajetë në dorë pa u vënë re nga askush? Kjo hipotezë konsiderohet pak e besueshme. Dyshohet se dikush tjetër ka sjellë makinën pranë banesës, për të minimizuar rrezikun.
Komente
