ITALI- Gjykata italiane ka dalë në përfundime të reja sa i takon autorit algjerian Fatah Malloul që masakroi me shtizë shqiptarin Klajdi Bitri në Itali.
Sipas mediave italiane, Melloul është cilësuar nga gjykata si kriminel i rrezikshëm i cili e ka të pamundur të kontrollojë temperamentin e tij dhe mund të kryejë vrasje sërish. Autori 27-vjeçar është lënë dje në burg nga autoritetet italiane.
Klajdi Bitri, i lindur në Itali, me nënshtetësi shqiptare, u qëllua me një shtizë peshkimi nga Fatah Malloul nga Algjeria, pasi ndërhyri për të shuar konfliktin ku ishte përfshirë shoku i tij. Autori algjerian Fatah Melloul, 27-vjeç, u largua pas vrasjes me një automjet tip Opel Astra ngjyrë gri, por u ndalua nga policia katër orë më vonë.
Ndërkohë, këtë të enjte pritet të mbërrijë në Shqipëri edhe trupi i Klajdi Bitrit. Ndërkohë është kontraktuar agjencia funerale për transportin dhe do të jetë Bashkia Lushnjë që do të mbulojë shpenzimet e sjelljes në atdhe të trupit.
Klajdi Bitri do të nderohet edhe nga Bashkia e Ankonës, pasditen e sotme do të mbahet një ceremoni përshpirtjeje dhe marshim nderimi për një djalë shqiptar me zemër kaq të madhe.
