Hetimet për vrasjen e Ilaria Sulës vijojnë të nxjerrin në dritë detaje të reja. Agjentët që po merren më çështjen kanë zbuluar se Ilaria është qëlluar 3 herë me thikë në qafë nga ish i dashuri i saj filipinas Mark Samson.
Plagët kanë qenë të rënda dhe I kanë shkaktuar asaj humbje në sasi kritike të gjakut çka ka qenë shkaktare për vdekjen e saj. Agjentët po përpiqen të rindërtojnë të gjithë ngjarjen dhe dinamikën e saj. Së fundmi ata kanë kontrolluar edhe makinën e ish të dashurit të saj me të cilën dyshohej se ai e kishte çuar në zonën pyjore ku hodhi trupin në një humnerë në fshatin Capranica.
Pas kontrolleve në makinën e tij hetuesit dyshojnë se vrasësi e ka futur trupin e Ilarias në një qese të zezë ndërsa bagazhi i makinës së tij ka qenë i vogël, dhe se trupi i të ndjerës nuk mund të qëndronte aty. Në makinën e tij hetuesit ndërkohë nuk kanë gjetur gjurmë gjaku, detaje këto që lënë ende pikëpyetje për mjetin apo mënyrën se si 23 filipinas e ka dërguar trupin e Ilarias larg shtëpisë në lagjen Homs ku ai banonte me prindërit.
La Repubblica thotë se analiza për mostrat e gjakut të gjetura nga policia gjatë kontrollit në banesë janë ende duke u zhvilluar, ndërsa hetuesit po analizojnë edhe rolin që mund të kenë patur prindërit e 23-vjeçarit Samson, të cilët ndodheshin në banesë kur është kryer vrasja. Vrasja e ndodhur për motive xhelozie u pranua nga vetë 23-vjeçari i cili në prokurori i ka kërkuar falje Flamurit, babait të Ilarias.
Ndërkohë në Romë vijojnë protesta si ndërgjegjësim ndaj vrasjes së Ilarias dhe rasteve të tjera të feminicidit. Një kortezh me mijëra pjesëmarrës kaloi nëpër lagjen San Lorenzo në Romë ku jetonte e reja Ilaria Sula para se të vritej.
Vrasja tragjike e 22-vjeçares shqiptare Ilaria Sulës në Itali nga ish-i dashuri i saj filipinas ka shkaktuar hidhërim në Itali. Shumë të rinj dhe të reja, veçanërisht bashkëstudentët në Universitetin “La Sapienza” në Romë, u mblodhën në shenjë proteste para godinës.
Fillimisht ata zhvilluan homazhe, duke vendosur lule poshtë fotos së 22-vjeçares së ndjerë, më pas filluan duke tundur disa çelësa në duar, si thirrje në formë simbolike drejtuar shtetit për të vënë drejtësi raportojnë mediat.
"Unë mund të isha atje në vendin e saj. Sot ndihem e frikësuar, humbas shpresën. Mbase dikush mendon për ndonjë ndryshim dhe në vend të kësaj kur përballesh me vdekjen e një bashkëmoshatari humbet shpresën. Nëse nuk ka asnjë sistem pas tij që të mbron, nuk ka asnjë dobi, sepse ekziston gjithmonë një rrezik në qoshe,' - thotë Lucia, shoqja e dhomës e të ndjerës, Ilaria Sula.
“Para dy vitesh ishim këtu në garnizon pas vrasjes së Giulia Cecchettin, por asgjë nuk ka ndryshuar ndërkohë, pavarësisht nga kryeministrja e parë femër në historinë e republikës, e cila është bashkëpunëtore dhe promotore e sistemit patriarkal”, tha një tjetër studente.
Prej një jave e zhdukur, 22-vjeçarja Ilaria Sula u gjet e vrarë. Trupi i pajetë u gjet në një valixhe të hedhur në humnerë në një zonë të pyllëzuar në Poli. Shqiptarja u vra nga ish-i dashuri i saj filipinas, Mark Samson, i cili ndodhet në qeli. Hetuesit arritën të zbulonin se në ditët pas zhdukjes së vajzës, 23-vjeçari filipinas kishte vazhduar të përdorte telefonin e saj dhe bënte postime nga profilet e Ilarias në mediat sociale për të fshirë dyshimet.
Komente
