Ministri i Shtetit për Marrëdhëniet me Parlamentin dhe Drejtuesi Politik i Partisë Socialiste për Diasporën, Taulant Balla, reagoi sot (3 prill) në rrjetin social Facebook, për vrasjen makabre të studentes shqiptare, Ilaria Sula në Itali, që ka tronditur opinionin publik në dy vendet.
Balla e cilësoi këtë akt si një “feminicid të tmerrshëm dhe brutal” dhe shprehu ngushëllimet e tij për familjen, miqtë dhe komunitetin shqiptar në Itali.
"Homazh për Ilaria Sula, studenten shqiptare nga Çerma e Divjakës, viktimë e një feminicidi të tmerrshëm dhe brutal që na ka lënë pa fjalë dhe me zemrën e thyer. Në këtë moment dhimbjeje, i qëndrojmë pranë familjes dhe njerëzve të saj më të dashur, miqve, kolegëve dhe komunitetit shqiptar në Itali", shprehet ai.
Balla vlerësoi protestën e studentëve të Universitetit La Sapienza në Romë, që nderuan edhe kujtimin e Ilaria Sulës dhe kërkuan ndërgjegjësim për dhunën ndaj grave.
"Solidaritet me protestën e studentëve të Sapienzas, të cilët vendosën të dëgjoheshin përmes zhurmës së çelësave të shtëpisë: minuta e zhurmës erdhi spontane, ndërsa të paktën 500 vajza dhe djem, profesorë dhe profesore, ishin para Fakultetit të Statistikës në një homazh për Ilarian", vijon ministri socialist.
Balla shfrytëzoi rastin për të bërë një thirrje publike që çdo grua të denoncojë dhunën në familje, duke theksuar se kjo është një çështje që i përket gjithë shoqërisë.
“Dhuna ndaj grave nuk është një çështje private. Ajo na intereson të gjithëve. Nuk mund të ketë #AsnjëJustifikim ndaj dhunës – as në shtëpi, as në vendin e punës, as në jetën publike, as online. Askund!”, u shpreh ai.
Ilaria, e lindur nga prindër që emigruan në Itali, me origjinë nga fshati Çermë i Divjakës, ishte studente në Romë kur u zhduk disa ditë më parë, derisa u zbulua trupi i masakruar dhe i futur në valixhe, i hedhur pranë një humnere. Autor ishte i dashuri i saj filipinas, po nga familje emigrantësh.
Ngjarja ka tronditur miqtë, studentët dhe fqinjët në Itali dhe Shqipëri, ku Ilarian dhe familjen e saj i njihnin si njerëz të punës dhe sakrificës për një jetë më të mirë.
Postimi i Taulant Ballës në Facebook
Komente
