Babai i Ilarias së ndjerë, Flamur Sula është me origjinë nga fshati Çermë e Sipërme, njësia administrative Tërbuf e Bashkisë Divjakë. Prej dy dekadash Flamuri me familjen jeton në Terni të Italisë, aty ku kanë lindur dhe fëmijët. Në fshat ka ndërtuar një vilë dykatëshe edhe pse vinte rrallë në vendlindje. Ngjitur me të është vila e të vëllait i cili bashkë me babanë e moshuar kanë udhëtuar drejt Italisë per ceremonine mortore.
Në fshatin Çermë e Sipërme, fqinjët janë të shokuar për masakrimin e 22-vjecares, ndersa shprehen se autori duhet te marre denim maksimal.
“Atë duhet ta vrasësh, jo ta lësh një të gjallë. E morëm vesh nga televizori dhe telefoni. Është një ngjarje e rëndë të vrasësh tjetrin për dashuri” tha një banor i zonës për Report Tv.
“E morëm vesh me anë të televizorit. E vrau ai miku, e futi në valixhe dhe e hodhi në pyje, kështu e mora vesh. Të marri dënimin që meriton. Jemi shokuar shumë, vajzë 22-vjeçe”, u shpreh tjetër.
“Ç’ është kështu. U tërbua rinia. U tërbuan gratë gjithë ditën në telefon. Është për të ardhur keq. Ai që e vrau të varet në mes të Milanos ose në Romë. Çfarë do bëjmë ne pleqtë e shkretë, kemi fëmijët në kurbet”, tha një banore për Report Tv.
Trupi i Ilaria Sula, studentja me origjinë shqiptare, 22 vjeç, e zhdukur që prej 25 marsit në Romë, në zonën e Furio Camillo, u gjet një ditë më parë brenda një valixheje të mbyllur, e hedhur në një greminë përgjatë rrugës provinciale 45B, në segmentin midis Capranica dhe Guadagnolo.
Ish-i dashuri Mark Antony Samson, 23 vjeç, student në universitetin "La Sapienza", me familje me origjinë nga Filipinet, por i lindur në Itali, thuhet se e ka vrarë Ilaria Sula ndoshta që të njëjtën natë të zhdukjes së saj. Vrasja ndodhi në shtëpinë e familjes së tij në Via Homs, në lagjen Africano, ndërkohë që prindërit e tij ndodheshin në banesë.
Pasi e vrau, ai e fshehu trupin në një valixhe, e cila ishte shumë e vogël për të mbajtur trupin e saj të tërë, dhe më pas e transportoi 40 km larg, duke hedhur thikën në një kazan plehrash.
Telefonin e viktimës e mbajti për vete, fshiu llogaritë e saj në rrjetet sociale, por iu përgjigj shkurt disa mesazheve. Në fund, pasi u zhduk edhe nga telefoni, e hodhi atë në një pusetë dhe shkoi personalisht në shtëpinë e shoqeve të saj për të shtirur sikur po e kërkonte.
Komente
